निर्वाचन निर्वाचन जस्तो हुन नसकेको ओलीको निष्कर्ष

काठमाडौं – प्रमुख प्रतिपक्षी दल नेकपा एमालेका अध्यक्ष केपी शर्मा ओलीले स्थानीय तहको निर्वाचन धाँधलीरहित र स्वच्छ रुपमा सम्पन्न हुन नसकेको बताएका छन् । बिहीबार संघीय संसदमा ओलीले सरकारले नीति तथा कार्यक्रममा निर्वाचन धाँधलीरहित र स्वच्छ रुपमा सम्पन्न भएको भन्दै दाबी गरे पनि त्यसो हुन नसकेको बताए । 

निर्वाचन निर्वाचन जस्तो नभएको ओलीको निष्कर्ष छ । सत्तारुढ गठबन्धनको अनेक जालझेल पश्चात भएको निर्वाचन पनि स्वच्छ रुपमा हुन नसकेको उनले बताए ।

‘निर्वाचन जित्नका लागि उम्मेदवारको अपहरण गर्ने, हत्या गर्ने, घर भत्काउने काम गर्ने काम भयो,’ ओलीले भने, ‘गठबन्धनले सबै ठाउँमा प्रतिपक्षका विरुद्धमा प्रहार गरेको थियो । गठबन्धनको घोषित नीति नै थियो जसरी हुन्छ एमालेलाई धुलो चटाइदिने, पत्तासाफ गरिदिने ।’

निर्वाचनको नतिजा समयमै नआउनुले पनि निर्वाचन धाँधलीरहित नभएको संकेत गरिरहेको उनले बताए । चुनाव भएको १४ दिनसम्म पनि सबै ठाउँको अन्तिम नतिजा किन आउन नसकेको हो भन्दै उनले सरकारसँग प्रश्न गरे । 

ओलीले निर्वाचनका क्रममा सहादत प्राप्त गर्ने सबैप्रति हार्दिक श्रद्धाञ्जली अर्पण गरे । साथै, उनले अंगभंग हुने गरी घाइते भएकाहरुको उपचारका लागि सरकारको ध्यानाकर्षण गराए ।