लिखित पत्र पछि ओलीले सुरु गरे नेपालसँग छलफल

काठमाडौं : नेकपाका कार्यकारी अध्यक्ष पुष्पकमल दाहालसहितका नेताले सचिवालय बैठक राख्‍न लिखित पत्र बुझाएको भोलिपल्ट प्रधानमन्त्री तथा नेकपा अध्यक्ष केपी शर्मा ओलीले माधव नेपालसहितका केही नेतालाई आइतबार अपरान्ह बालुवाटारमा बोलाई छलफल सुरु गरेका छन् ।

अघिल्लो दिन कार्यकारी अध्यक्ष दाहाल, नेता नेपालसहित सचिवालयका कूल नौ मध्ये पाँच सदस्यले बैठक बोलाउन लिखित पत्र नै ओलीलाई बुझाएका थिए । 

बैठकमा ओलीका तर्फबाट खास तथा ठोस प्रस्ताव नआए पनि पूर्व प्रधानमन्त्री एवं वरिष्ठ नेता नेपालको धारणा बुझ्‍ने काम मात्र भएको बैठकमा सहभागी पूर्व मन्त्री एवं नेता सुरेन्द्र पाण्डेले बताए । ‘उहाँ (ओली) बाट ठोस प्रस्ताव केही आएन, हाम्रा धारणा सुन्‍ने काम मात्र भयो,’ बैठकपछि स्थायी कमिटी सदस्य पाण्डेले इकागजसँग भने ।

नेपाल लगायतका नेताले ओलीलाई कार्यदलका तर्फबाट नेकपाको एकता, प्रधानमन्त्रीलाई सहयोगका लागि प्रयास गरिएको स्मरण गराएका थिए । ‘पार्टी फुटको संघारमा छ, हामीले न्यूनतम जमिनी तह (बटमलाइन) मा बसेर काम गरेको हो,’ नेता नेपालको भनाइ उद्धृत गर्दै पाण्डेले भने, ‘हामीले तपाईं पार्टी अध्यक्ष, तपाईं प्रधानमन्त्री, तपाईंको काँधमा जिम्मेवारी बढी छ तपाईंले नै हो समाधान गर्ने भन्यौ । ठोस प्रस्तावका कुरा केही भएन ।’ के उद्देश्यले नेपाललगायत तपाईं नेताहरुलाई ओलीले बोलाउनु भयो भन्‍ने प्रश्‍नमा पाण्डेले भने, ‘त्यो त कसरी थाहा पाउनु र ?’

यसैगरी बैठकमा सहभागी अर्का नेता भीम रावलले पनि प्रधानमन्त्रीसँगको छलफलका क्रममा कुनै निर्णय नभएको बताए । ‘निर्णय केही भएन, सामान्य विचार राख्ने काम मात्र भयो,’ नेता रावलले इकागजसँग भने, ‘ ठोस प्रस्ताव थिएन, विवरणात्मक मात्र थियो ।’

पूर्व प्रधानमन्त्री नेपाल, स्थायी कमिटी सदस्यहरु रावल, रघुजी पन्त र पाण्डेसहित बालुवाटार पुगेका थिए ।