साहित्यिक पुस्तकको लेखकस्वमा लाग्दै आएको कर घटेपछि लेखक न्यौपानेले दिए सरकारलाई धन्यवाद

काठमाडौं– सरकारले साहित्यिक पुस्तकको लेखकस्वमा लाग्दै आएको कर घटाएपछि लेखक अमर न्यौपानेले सरकारलाई धन्यवाद दिएका छन् । संसदमा आइतबार अर्थमन्त्री जनार्जदन शर्माले प्रस्तुत गरेको बजेटमा लेखकहरूलाई लाग्दै आएको १५ प्रतिशत कर कम भएर १. ५ प्रतिशतमा झरेपछि न्यौपानेले सामाजिक सञ्जाल फेसबुकमा एउटा पोस्ट लेख्दै सरकारलाई धन्यवाद दिएका हुन् । 

न्यौपानेले आफूहरु गत वैशाखमा करको विषयमा अर्थमन्त्री जनार्दन शर्मासँग छलफल गर्न अर्थ मन्त्रालय पुगेको उल्लेख गरेका छन् ।

‘गत वैशाख आठ गते म अर्थमन्त्रीलाई भेट्न एक जना मित्रका साथमा अर्थ मन्त्रालय गएका थियौं । उद्देश्य साहित्यिक पुस्तकहरूमा लाग्दै आएको १५ प्रतिशत कर छुट या न्यून गरी लेखकहरूलाई प्रोत्साहन गरिदिन अनुरोध गर्न थियो,’ उनले लेखेका छन्, ‘अर्थमन्त्री तथा मन्त्रालयका सहसचिव र आर्थिक सल्लाहकारहरूलाई मौखिक व्याख्यासहित लिखित निवेदन पनि पेस गरेको थिएँ । उतिखेर अर्थमन्त्रीले तोक लगाएर सचिवालयमा पठाउनुभएको थियो ।’

उनले अगाडि लेखेका छन्, ‘‘नेपाली साहित्यको बजार सानो छ । सानो बजारलाई विकास गर्न र लेखकहरूलाई प्रोत्साहन गर्न बजेटमा सम्बोधन गरिएकोमा अर्थमन्त्री, अर्थमन्त्रालयका सचिव, सहसचिव तथा आर्थिक सल्लाहकारहरूलाई लेखकहरूको तर्फबाट हार्दिक धन्यवाद ।’