‘प्रकाश’ टिजर, सूर्य रोकाया बनेका प्रदीपको शिक्षक सपना पछ्याउने कथा

काठमाडौँ - प्रदीप खड्काले फरक भूमिकामा अभिनय गरेको भनी चर्चा गरिएको फिल्म ‘प्रकाश’को टिजर सार्वजनिक भएको छ । प्रदर्शनका लागि दुई महिना बढी समय रहँदा प्रचारमा उत्रँदै निर्माण टिमले टिजर सार्वजनिक गरेको हो ।

पौने दुई मिनेट लामो टिजरमा प्रदीपले बुबाको सपना पूरा गर्न शिक्षक बन्न गर्नु परिरहेको संघर्षलाई छरितो गरी देखाएको छ । टिजरमा दिया मास्केले पनि ठाउँ पाएकी छिन् ।

रोमान्टिक लभरब्वाईको रुपमा अभिनय यात्रा सुरु गरेका प्रदीपले टिजरमा यो छवि छोड्ने कोशिस गरेका छन् । टिजरमा उनले कर्णाली प्रदेशको भाषा पनि टिप्ने कोशिस गरेका छन् । 

दिनेश राउत निर्देशित फिल्ममा राजन खतिवडा, रानु योगी, प्रकाश घिमिरेको पनि महत्वपूर्ण भूमिका रहेको छ । राजेश श्रेष्ठको छायांकन रहेको फिल्मको पटकथा विकास सुवेदीले लेखेका हुन् ।