मिथाली राजले लिइन् अन्तर्राष्ट्रिय क्रिकेटबाट सन्‍न्‍यास

काठमाडौँ – भारतीय क्रिकेट टिमकी कप्तान मिथाली राजले अन्तर्राष्ट्रिय क्रिकेटबाट सन्न्यास लिएकी छन् । मिथालीले सामाजिक सञ्जाल ट्विटरमार्फत सन्न्यासको घोषणा गरेकी हुन् ।

३९ वर्षीया मिथालीले भारतीय टिम सक्षम खेलाडीको हातमा रहेको भन्दै सन्न्यासको लागि उचित समय आएको बताइन् । मिथालीले भारतका लागि १२ टेस्ट, २ सय ३२ एकदिवसीय तथा ८९ टी-ट्वान्टी खेलेकी छन् ।

उनले पछिल्लो पटक यसै वर्ष आयोजना भएको एकदिवसीय विश्वकपमा भारतीय टिमको कप्तानी गरेकी थिइन् । उनले एकदिवसीयमा ७ हजार ८ सय ५ रन बनाउँदा ७ शतक समेत प्रहार गरेकी थिइन् । मिथालीले टेस्टमा एक शतक सहित ६ सय ९९ रन जोडिन् भने टी-ट्वान्टीमा २ हजार ३ सय ६४ रन जोड्दा १७ अर्धशतक प्रहार गरेकी थिइन् ।

समग्रमा १० हजार ८ सय ६८ रन बनाएकी मिथाली अन्तर्राष्ट्रिय महिला क्रिकेटमा सर्वाधिक रन बनाउने खेलाडी हुन् । साथै एकदिवसीयमा पनि उनी सर्वाधिक रन बनाउने महिला क्रिकेटर हुन् ।