मह जोडीको ‘महापुरुष’ असार पहिलो सातादेखि फ्लोरमा

काठमाडौँ - जेठ २९ गते फ्लोरमा जाने तयारी गरिरहेको मदन कृष्ण श्रेष्ठ र हरिवंश आचार्यको मुख्य भूमिका रहने ‘महापुरुष’को सुटिङ एक हप्ता पर सरेको छ । लेखक तथा निर्देशक प्रदीप भट्टराईले तयारी नपुगेकोले असारको पहिलो हप्ताबाट सुटिङ गर्ने तयारी भइरहेको जानकारी गराए । 

मह जोडीसँगै राजाराम पौडेल र गौरी मल्लको पनि प्रमुख भूमिका रहने फिल्ममा नयाँ कलाकारले पनि अभिनय गर्न गइरहेको निर्देशक भट्टराईले जानकारी गराए । उनले यो पटक हिरो हिरोइनको रुपमा नयाँ कलाकारलाई लिएर काम गर्न लागेको र उनीहरूलाई केही दिनमै सार्वजनिक गर्ने तयारी भइरहेको जानकारी गराए ।

‘हामीले हिरो हिरोइनको रुपमा यो पालि नयाँ कलाकारलाई डेब्यू गराउँदैछौँ । उनीहरूको ड्रेस बनिरहेको छ । केही दिनमै फोटोसुट गरेर सार्वजनिक गर्छौँ,’ उनले भने । यो फिल्मबाट कवि नवराज पराजुलीले पनि गीतकारको रुपमा सिनेमामा डेब्यू गर्दैछन् ।

निर्देशक भट्टराईले चार गीत रहने फिल्मका चारै गीत नवराज पराजुलीले लेखेको र संगीत ऋदम कँडेलको रहने जानकारी गराए । दिपेश खत्री निर्माता र रविन्द्र सिंह बानियाँ कार्यकारी निर्माता रहेको फिल्ममा अरुण क्षेत्रीको पनि अभिनय रहनेछ । प्रदीपले यसअघि ‘जात्रा’का दुई भाग र ‘शत्रुगते’को निर्देशन गरेका छन् ।