चुडाल र सुवेदीको संसदीय सुनुवाइ प्रक्रिया सुरु

काठमाडौँ : सर्वोच्च अदालतको न्यायाधीशमा प्रस्तावित कुमार चुडाल र नहकुल सुवेदीको संसदीय सुनुवाइ प्रक्रिया सुरु भएको छ । संघीय संसदको संसदीय सुनुवाइ समितिको चैत्र ४ गतेको बैठकको निर्णय अनुसार न्यायपरिषद्‍बाट सर्वोच्च अदालतको न्यायाधीश पदमा प्रस्तावित चुडाल र सुवेदीलाई नियुक्त गर्न उपयुक्त छैन भन्‍ने कसैलाई लागेमा स्पस्ट आधार खोली समिति समक्ष १० दिन भित्र उजुरी दिन सरकारी सञ्‍चार माध्यमबाट सूचना जारी गरेको थियो । 

यो अवधिभित्र सात वटा उजुरी परेको समिति सभापति लक्ष्मणलाल कर्णले बताए । समितिको आज (बिहीबार)को बैठकले उजुरीहरू खोली समिति सदस्यहरूलाई वितरण गरेको छ । यस्तै प्रस्तावित न्यायाधीशहरूबाट प्राप्त कार्ययोजनाको प्रतिलिपिसमेत समिति सदस्यहरूलाई वितरण गरेको छ । 

बैठकले यही चैत्र २२ गते उजुरीकर्तालाई बोलाई छलफल गर्ने र चैत्र २५ गते प्रस्तावित न्यायाधीशहरूलाई बोलाई सुनुवाइ गर्ने निर्णयसमेत गरेको छ । न्यायपरिषद्ले उच्च अदालत, पाटनका मुख्य न्यायाधीश कुमार चुडाल र सुर्खेतका मुख्य न्यायाधीश नहकुल सुवेदीको नाम सर्वोच्चको न्यायाधीशका लागि सिफारिस गरेको थियो । 

संसदीय सुनुवाइबाट दुवैको नाम अनुमोदन भएमा उनीहरूको नियुक्ती सर्वोच्च अदालतको न्यायाधीश पदमा हुनेछ ।