जनतालाई इन्डक्सन चुलो होइन, बिजुलीको अनवरत आपूर्ति र महसुल घटाइदिए पुग्छ : सांसद  शाक्य

काठमाडौं–सांसद सुजिता शाक्यले सरकारलाई जनतालाई इन्डक्सन चुलो होइन, विजुलीको अनवरत आपूर्ति र महसुल घटाइदिन आग्रह गरेकी छिन् । संसद्मा जारी मन्त्रालयगत बजेट छलफलमा बोल्दै उनले विद्युत महसुल घटाउन आग्रह गरेकी हुन् । ‘जनतालाई इन्डक्सन चुलो होइन विजुलीको अनवरत आपूर्ति र महसुल घटाइदिए पुग्छ भन्ने कुरा राखेका छन्,’ उनले भनिन्, ‘जनआवाजको सुनुवाई होस् ।’

उनले सरकारले विद्युतको खपत बढाउने भए पनि महसुल महंगो भएका कारण खपत बढाउन मुस्किल हुने बताइन् । ‘सरकारले विद्युतको खपत बढाउन भनेर धेरै कुरा गरेको छ,’ उनले भनिन्, ‘तर उपभोक्तालाई भने चर्को मूल्यमा खपत गर्न बाध्य बनाउने स्थिती बनाउँदा खपत कसरी बढ्छ । यसरी त ल्हास्सामा  सुन छ कान मेरो बुच्चै भने जस्तै भएन ।’

सांसद शाक्यले इन्डक्सन चुलो वितरण गर्ने कुरा पनि स्यानिटरी प्याडको योजना जस्तै हुने त होइन भन्दै व्यंग्य समेत गरेकी छिन् । ‘सरकारले विद्युतको खपत बढाउने भनेर इन्डक्सन चुलो वितरण गर्ने योजना ल्याएको छ,’ उनले भनिन्, ‘यसको औचित्य कति छ । सोचनीय छ । सरकारले जनतालाई साँच्चै नै माया गर्ने हो भने त्यसैसँग तपेस र त्यसमा पकाउने सामग्री पनि बाँडे जनताले राहत पाउँथे । तर यो इन्डक्सन चुलोको कथा पनि स्यानिटरी प्याडको जस्तै हालत त हुने होइन ?भन्ने मलाई चिन्ता लागेको  छ।’