संघीयता असफल भएको छैनः सभामुख श्रेष्ठ

मकवानपुर - नेपालको संघीय संरचनाको बारेमा अनावश्यक टिप्पणी भएको प्रति बागमती प्रदेश सभाका सभामुख सानुकुमार श्रेष्ठले ध्यानाकषर्ण जनाएका छन् । नेपालको संघीय संरचनाबारे अनावश्यक टिप्पणी नगर्न उनले आग्रह गरे ।

आज बाग्मती प्रदेश सरकारको उद्योग, पर्यटन तथा वातावरण समितिले आयोजना गरेको लैङ्गिक तथा सामाजिक समावेशीकरण विषयक कार्यक्रममा बोल्दै सभामुख श्रेष्ठले यस्तो आग्रह गरेका हुन् ।

संघीय संरचनाका बारे कसैले पनि विस्तृत र गहन अध्ययन नगरेको भन्दै अनुमानको भरमा टिप्पणी बन्द गर्नुपर्ने उनले बताए ।

`संघीयता फेल भयो, संघीयता पास भयो भनेर हचुवाको भरमा भन्ने  होइन, बजेटको कुरादेखि सबैमा प्रभावकारिताको मूल्यांकन गरेर अघि बढ्नुपर्छ, यसले भोलिका दिनमा आउने पुस्ता र संसद्लाई शिक्षाको विषयवस्तु बन्नेछ` उनले भने ।

बागमती सरकारको तर्फबाट पनि प्रदेशको काम के कति भयो भन्नेबारेमा बजेट सकिएपछि छलफल गर्ने तयारी भएको उनले बताए । “हामीले गरिरहेको कामहरूको समीक्षा हुन जरुरी छ” उनले भने ।

कार्यक्रममा बागमती प्रदेश सांसद सीता लामाले अपाङ्गता भएका व्यक्तिका लागि प्रदेशले आवश्यक बजेट छुट्याउन नसकेको गुनासो गरिन् । उनले सामाजिक वृद्धि विकास गर्ने कुरा नीतिमा कागजमै सीमित भएको तर बजेटमा आउन नसकेको बताइन् ।