मधेश प्रदेशको बजेट चुनाव केन्द्रित रहेको प्रतिपक्षी दलको आरोप

जनकपुर - मधेश प्रदेश सरकारले आगामी आर्थिक वर्ष २०७९/०८० का लागि ल्याएको बजेट चुनाव केन्द्रित र कार्यकर्तामुखी बजेट रहेको प्रतिपक्षी दलहरुले आरोप लगाएका छन् ।  बुधबार प्रदेश सभामा मधेश सरकारका तर्फबाट अर्थमन्त्री शैलेन्द्र प्रसाद साहले आगामी आ.व.का लागि ४६ अर्ब ८८ करोडको बजेट विनियोजन गरेका छन् । 

बजेट बारे प्रतिक्रिया दिँदै प्रमुख प्रतिपक्षी दलका नेता जितेन्द्र सोनलले प्रदेश सरकारले ल्याएको बजेट मतदातालाई रिझाउन चुनाव केन्द्रित र कार्यकर्तामुखी रहेको बताए । उनले भने, `चुनावलाई केन्द्रित गरेर बजेटमा कार्यक्रमहरु राखिएको छ, अत्यावश्यक कार्यक्रमभन्दा पनि कार्यकर्ताबाट कमिसन आउने खुद्रे योजनामा बढी केन्द्रित छ, आर्थिक बोझ कम गर्नुको सट्टा खर्च बढाइएको बजेट कार्यान्वयन हुने अवस्था छैन ।` 

त्यस्तै लोसपाका प्रमुख सचेतक परमेश्वर साहले सो बजेटलाई परम्परावादी र यथास्थितीवादीको संज्ञा दिएका छन् । बजेट बारे टिप्पणी गर्दै उनले पनि आगामी निर्वाचनलाई प्रभावित गर्नेगरी खुद्रे कार्यक्रमहरुलाई प्राथमिकता दिइएको बताए । 

बजेट पूर्णतया अनुत्तरदायी र हावादारी रहेको टिप्पणी गर्दै उनले खुद्रे योजनाहरु कार्यकर्तामुखी हुन भने दीर्घकालीन योजनाहरु पुरा हुने अवस्थाको नरहेको कारण त्यो हावादारी भएको बताए । 

त्यस्तै अर्का प्रतिपक्षी दल नेकपा एमालेका संसदीय दलका नेता सत्यनारायण मण्डलले पनि यो बजेटलाई चुनाव केन्द्रित र कार्यकर्तामुखी रहेको टिप्पणी गरे ।

उनले भने, `यो बजेट पूर्णतया चुनाव केन्द्रित हो, मतदातालाई प्रभावमा पार्न मन्त्रीहरुले अधिकांश योजनाहरु आ-आफ्नो क्षेत्रको नामै किटेर लगेका छन । त्यति मात्र होइन बजेटमा दीर्घकालीनभन्दा पनि खुद्रे योजनालाई ग्राह्यता दिएर कार्यकर्तामुखी बनाइएको छ ।` 

मण्डलले बजेट चुनाव केन्द्रित भएको कारण कार्यान्वयनमा आशंका व्यक्त गरे । उनले भने, `अनुमानित श्रोतभन्दा बढी बजेट ल्याएको छ, तर त्यो कतिको श्रोत जुटाएर कार्यान्वयनमा ल्याउन सकिन्छ भन्ने आधार देखिंदैंन ।`