भदौ १७ मा आउने भयो केकी र आँचलकाे ‘झिँगेदाउ’

काठमाडौँ- ज्ञानेन्द्र देउजाको निर्देशनमा निर्माण भएको सिनेमा ‘झिँगेदाउ’को दुई पोस्टर सार्वजनिक गर्दै प्रदर्शन मिति घोषणा गरिएको छ । यसअघि भदौ ३१ गतेलाई प्रदर्शन मिति घोषणा गरिएको सिनेमा अब भदौ १७ गतेबाट नेपाल भरका सिनेमा घरमा रिलिज हुनेछ । निर्माता देउजाले सिनेमाको रिलिज दुई हप्ता अगाडि- प्रिपोन्ड भएको बताए ।

कोरोना महामारी अगाडि नै अधिकांश छायांकन सकिएको सिनेमाको केही दिन अगाडि मात्रै एक गीतको छायांकन गरिएको थियो । पोष्ट प्रोडक्सनको काम समेत अन्तिम चरणमा रहेको सिनेमाको केही दिनमा गीत रिलिज गर्दै प्रचार प्रचारको काम आरम्भ गरिनेछ । राम्रो सिनेमा बनेकाले पनि सिनेमा रिलिजका लागि उपयुक्त रिलिज मिति भदौ १७ नै लागेकाले वितरकको आग्रहमा रिलिज प्रिपोन्ड गरिएको निर्देशक देउजाले जानकारी गराए ।

सिनेमामा केकी अधिकारी मुकुन भुषाल, आँचल शर्मा र कुशल बिष्टले मुख्य भूमिका निवार्ह गरेका छन् । झिँगेदाउमा रामजी लामिछानेको कोरियोग्राफी, अर्जुन पोखरेलको संगीत, बिष्णु घिमिरेको छायांकन, मित्र डि गुरुङको सम्पादन छ । कपनगडी सिनेमा र फिल्म क्रियु नेपालको ब्यानरमा निर्माण भएको सिनेमा भिमनिधि तिवारीको कथा ‘झिँगेदाउ’मा आधारित रहेको छ । प्रदीप भारद्वाजले पटकथा तथा सम्वाद लेखेको सिनेमाका निर्माता सुलभ, समीक्षा र सुशील हुन् ।