यू-१५ क्रिकेटः मधेश र बागमती प्रदेश फाइनलमा

काठमाडौँ - मधेश प्रदेश र बागमती प्रदेश बलियो नेपाल कप यू-१५ क्रिकेट प्रतियोगिताको फाइनल प्रवेश गरेका छन् । मूलपानी क्रिकेट मैदानमा भएको पहिलो सेमिफाइनल खेलमा प्रदेश १ लाई ५ विकेटले पराजित गर्दै बागमती फाईनल प्रवेश गरेको हो ।

वर्षाका कारण १२ ओभरमा छोट्याइएको खेलमा टस हारेर ब्याटिङ्गको निम्तो पाएको प्रदेश १ ले ६३ रन जोडेको थियो । जवाफमा ६४ रनको लक्ष्य बलियो बागमतीले १०.५ ओभरमा ५ विकेट गुमाएर पूरा गर्‍यो ।

दोस्रो सेमिफाईनल खेलमा लुम्बिनी प्रदेशमाथि २ विकेटको रोमाञ्चक जित दर्ता गर्दै मधेश प्रदेश फाईनल प्रवेश गरेको छ । १९ ओभरमा छोट्याइएको खेलमा टस जितेर पहिले ब्याटिङ्ग गर्दै लुम्बिनी प्रदेशले ७ विकेटको क्षतिमा १०० रन जोडेको थियो । जवाफमा १ सय १ रनको लक्ष्य पछ्याएको मधेश प्रदेशलाई ३ बलमा २ रन आवश्यक रहँदा साईमन रोएले छक्का प्रहार गर्दै खेल जिताए ।

प्रतियोगिताको फाइनल खेल सोमबार हुनेछ ।