के विराट र बाबर एउटै टिमबाट खेल्न लागेका हुन् ?

काठमाडौँ - आईसीसी वा एसीसीले आयोजना गर्ने प्रतियोगिताबाहेक भारत र पाकिस्तानबीच कुनै पनि क्रिकेट खेल हुने गरेको छैन । दुई देशबीच क्रिकेट सिरिज आयोजना नभएको वर्षौ भइसक्यो भने विश्वकै सबैभन्दा ठूलो फ्रेन्चाइज्ड लिगको रुपमा रहेको इन्डियन प्रिमियर लिगमा समेत पाकिस्तानी खेलाडीहरूले खेल्न पाउदैनन । सन् २०१२ देखि नै दुई देशबीच कुनै पनि सिरिज हुन सकेको छैन। 

भारत र पाकिस्तानबीच प्रायजसो आईसीसी अथवा एसीसीले आयोजना गर्ने प्रतियोगितामा बल्लतल्ल भेट हुने गर्छ र उक्त खेलले अधिकांश क्रिकेट प्रेमीको ध्यान तान्ने गरेको छ । 

दुई देशबीच सिरिज नहुने तथा दुवै देशमा हुने लिगमा एक-अर्काको देशको खेलाडीलाई समेत समावेश नगर्ने अवस्था हुँदा के पाकिस्तान र भारतका क्रिकेट खेलाडीहरू एकै टिमबाट खेल्न सम्भव छ ?

खासमा एसियन क्रिकेट काउन्सिल (एसीसी) ले पुनः अफ्रो-एसियन कप आयोजना गर्न तयारी गरिरहेको छ । यस अघि सन् २००५ र सन् २००७ मा अफ्रो-एसिया कप भएको थियो । सन् २००५ मा तीन खेलको एकदिवसीय सिरिज भएको थियो भने सन् २००७ मा एक खेलको टी-ट्वान्टी सिरिज समेत भएको थियो ।

अफ्रो-एसियन कपमा भारत र पाकिस्तानका उत्कृष्ट खेलाडीहरूले यसमा खेल्न सक्नेछन् र यसको अर्थ भनेको भारतका विराट कोहली र रोहित शर्मा तथा पाकिस्तानका बाबर आजम र मोहम्मद रिजवान जस्ता क्रिकेटरको सहभागिता हुन सक्छ । 

एसीसीले २०२३ मा अफ्रो-एसियन कप आयोजनाका लागि तयारीमा जुटेको छ । यदि सो कप आयोजना भए त्यसमा भारत, पाकिस्तान, अफगानिस्तान, श्रीलंका र बंगलादेशका खेलाडीको सहभागितामा एसिया-११ नामक टिम बन्ने बताइएको छ ।