पाकिस्तानविरुद्धको पहिलो एकदिवसीयमा डुसेनको शतक

काठमाडौँ : पाकिस्तानविरुद्धको पहिलो एकदिवसीय क्रिकेटमा दक्षिण अफ्रिकाका ब्याट्सम्यान रसीभानडेर डुसेनले शतक बनाएका छन् । सेन्चुरिएनमा टस हारेर पहिले ब्याटिङ गरेको दक्षिण अफ्रिकाले खराब सुरुवात गर्दा डुसेनले पाली सम्हालेका थिए ।

चौथो नम्बरमा क्रिजमा आएका डुसेनले नटआउट १२३ रन बनाए । १३४ बलको सामना गरेका डुसेनले १० चौका र दुई छक्का प्रहार गरे । उनले डेभिड मिलरसँग ११६ रनको साझेदारी गरेका थिए । मिलर ५० रनमा आउट भए । 

पाकिस्तानका शहिन अफ्रिदी र ह्यारिस रउफले दुई दुई विकेट लिए । डुसेनको शतक मद्दतमा दक्षिण अफ्रिकाले निर्धारित ५० ओभरमा ६ विकेट गुमाएर २७३ रन बनायो । पाकिस्तानले २७४ रनको लक्ष्य पछ्याउँदै जवाफी ब्याटिङ गर्नेछ ।

दक्षिण अफ्रिका भ्रमणमा रहेको पाकिस्तानले तीन खेलको एकदिवसीय र चार खेलको टी-ट्वान्टी क्रिकेट खेल्नेछ ।