सांसद गुप्ताकाे दुखेसो : ट्राफिक प्रहरीले सवारी साधन चेक गरेर हैरान पारे

काठमाडौँ- प्रतिनिधि सभा सदस्य बृजेश कुमार गुप्ताले ट्राफिक प्रहरीले सवारी साधन चेक गरेर हैरान पारेको बताएका छन् । मंगलबार प्रतिनिधि सभा बैठकको शून्य समयमा बोल्दै सांसद गुप्ताले यस्तो बताएका हुन् । सरकारले लाइसेन्स नहुनेलाई गाडी दिनु नहुने बताउँदै उनले गाडी आयात नगर्न र लाइसेन्स तुरुन्त दिन माग गरे ।

यस्तै बैठकको शून्य समयमा बोल्दै सांसद विमला नेपालीले यस वर्ष बाढी, पहिरोबाट हुने क्षतितर्फ सरकारले बेलैमा ध्यान दिनुपर्ने बताइन् । नेपालीले यस वर्ष वर्षाका कारण ठूलो जनधनको नोक्सानी हुनसक्ने भन्दै सरकारले बेलैमा ध्यान दिनुपर्ने जिकिर गरिन् । उनले पृथ्वी राजमार्गको मलेखु-मुग्लिन सडकखण्डमा पहिरोका कारण यात्रुले कष्ट भोगेको प्रति सरकारको ध्यानाकर्षण पनि गराइन् ।