अर्थमन्त्रीले राजीनामा दिएपछि मात्रै उहाँको कुरा सुन्छौँ : योगेश भट्टराई

काठमाडौँ- नेकपा एमालेका सांसद् योगेश भट्टराईले अर्थमन्त्री जनार्दन शर्माले राजीनामा दिएपछि मात्रै मन्त्री शर्माको स्पष्टिकरण सुन्ने बताएका छन् । संसद्को बुधबारको बैठकमा उनले यस्तो बताएका छन्  ।

‘उहाँ माथि कारबाही गर्ने तमाम कानुनी आधारहरू विद्यमान छन्,’ उनले भने, ‘यसकारणले उहाँ कारबाहीको भागिदार हुनुहुन्छ । यति गम्भीर नैतिक प्रश्न उठिसकेको अर्थमन्त्रीले अब यो रोष्टममा अर्थमन्त्रीको रुपमा सम्बोधन गर्ने कुनै नैतिक अधिकार छैन । अब अर्थमन्त्रीको रुपमा होइन । उहाँले अब राजीनामा दिनुहोस् । राजीनामा दिइसकेपछि  उहाँले यो गरिमामय संसद्मा बोल्न पाउनुहुन्छ । त्यसपछि उहाँको भाषण हामी सुन्न तयार छौँ ।’ उनले प्रधानमन्त्रीलाई अर्थमन्त्रीलाई बर्खास्त गर्न समेत आग्रह गरे । 

 सभामुख अग्नि सापकोटाले अर्थमन्त्री शर्मालाई बोल्न समय दिएपछि एमालेका सांसदहरूले विरोध जनाएका थिए । सांसद् भट्टराईले बोलिसकेपछि सभामुखलाई पुन बोल्न समय दिएपछि एमालेका सांसदहरुले विरोध जनाउँदै संसदबाट बाहिरिएका थिए।