बलिउडका ६ महिना : ३ फिल्म मालामाल बाँकी सबको बेहाल

मुम्बई - बलिउडले सन् २०२२ को पहिलो ६ महिनामा दुःख लाग्दो समय गुजारेको छ । पहिलो ६ महिनामा रिलिज भएका फिल्ममध्ये ३ बाहेक बाँकी सबैले पैसा गुमाएका छन् ।  रिलिज भएमध्ये हल रिलिजबाट पैसा सुरक्षित गर्नेमा विवेक अग्निहोत्री निर्देशित ‘दि कश्मिर फाइल्स’, संजयलीला भन्साली निर्देशित ‘गंगुबाई कठैयावाडी’ र अनिस बज्मी निर्देशित ‘भुलभुलैया २’ रहेका छन् । 

तेस्रो महामारीबाट उम्केर बलिउडले अघिल्लो वर्षको नोभेम्बरमा अक्षयकुमारको ‘सूर्यवंशी’सँगै लयमा फर्कने संकेत गरेको थियो । तर, सन् २०२२ मा अक्षयकुमार नै सबैभन्दा धेरै असफल रहे । उनले खेलेका ‘बच्चन पाण्डे’ र ‘पृथ्वीराज’ले निर्माताको सातो खाए । यो क्रममा सबैभन्दा धेरै गुमायो भारतकै सबैभन्दा ठूलो फिल्म निर्माण कम्पनी यशराज फिल्मस् । सन् २०२२ मा दुई फिल्म रिलिज गरेको यशराजले दुवै फिल्मबाट चर्को घाटा सहनु परेको छ । यशराजले यो साल ‘पृथ्वीराज’ र ‘जयशभाइ जोरदार’ गरी दुई फिल्म रिलिज गरेको थियो । 

योबाहेक बलिउडले आश गरेका ‘जर्सी’, ‘हिरोपन्ती २’, ‘धाकड’, ‘अनेक’, ‘निकम्मा’, ‘अट्याक’, ‘राधेश्याम’ जस्ता फिल्मले अत्यन्तै कमजोर व्यापार गरे । ‘धाकड’, ‘अट्याक’ जस्ता फिल्मले ३ करोड पनि ग्रस गर्न सकेनन् जबकि यी फिल्मको लगानी ५० करोड कम थिएन । बलिउडमा यो साल दक्षिण भारतका दुई फिल्मले अपत्यारिलो कमाइ गरे । ‘आरआरआर’ र ‘केजीएफ २’को मूल भाषा हिन्दी थिएन तर यी दक्षिण भारतका यी दुई फिल्मले हिन्दी भाषी दर्शकबाट प्रशस्त पैसा लिएर गए । कतिपय विश्लेषक भने दक्षिण भारतका यिनै दुई फिल्मले बलिउड फिल्म उद्योग बचाएको दाबी गर्छन् ।

महामारीपछि दुई खालको ट्रेन्ड देखिएको बलिउडका व्यापार विश्लेषकहरू बताउँछन् । मन परेका फिल्म लामो समय चल्ने तर मन नपरेका फिल्म दुई दिन पनि नटिक्ने । महामारीअघि यस्तो ट्रेन्ड नरहेको विश्लेषक बताउँछन् ।  दर्शक पहिले जस्तो फिल्म र कलाकारलाई लिएर सहिष्णु नरहेको पनि विश्लेषकको अनुमान छ । महामारीपछि दर्शक हिरो वा ब्यानर हेरेर नभई फिल्म हेरेर पैसा खर्च गर्ने मनस्थितिमा पुगेको विश्लेषक दाबी गर्छन् ।