घूस रकमसहित इन्जिनियर अख्तियारको फन्दामा

काठमाडौं– अख्तियार दुरुपयोग अनुसन्धान आयोगले सडक निर्माणमा संलग्न एक इन्जिनियरलाई ५० हजार रुपैयाँ घूससहित शुक्रबार पक्राउ गरेको छ ।

आयोगका अनुसार रोल्पाको गंगादेव गाउँपालिकाका कार्यालयका इन्जिनियर नविन डाँगीले मोटरबाटो निर्माण योजनाका नापी किताब, बिल तयार गरिदिएवापत सेवाग्राहीसँग घुस रकम लिएका हुन् ।

इन्जिनियर घूस लिएको सूचना पाएपछि आयोगको नेपालगञ्जबाट खटिई गएको टोलीले नविन डाँगीलाई सेवाग्राहीसँग ५० हजार घूस लिइसकेको अवस्थामा नियन्त्रणमा लिएको हो । 

उक्त घुस रकमसहित गंगादेव गाउँपालिका–२ स्थित स्वास्थ्य शाखाको भवनमा निवास बनाएका डाँगीलाई नियन्त्रणमा लिएको हो । उनीमाथि थप अनुसन्धान भइरहेको आयोगले जनाएको छ ।