दर्शक लोभ्याउँदै 'नेपाल्स सिङ्गिङ सुपरस्टार'

पछिल्लो समय नेपाली टेलिभिजनका पर्दाहरुमा गायनसँग सम्बन्धित धेरै रियालिटी सोहरु प्रसारणमा आइरहेका छन् । विदेशी फ्रेञ्चाइजहरुले स्थान लिइरहेको अवस्थामा पछिल्लो क्रममा केहि हप्ता पहिलेबाट नेपाली टेलिभिजनमा छुट्टै गायन रियालिडी सो प्रसारणमा आइरहेको छ, 'नेपाल्स सिङ्गिङ सुपरस्टार' ।

असार १२ गतेदेखि प्रसारण सुरू भएको यो रियालिटी सोलाई निर्माण कम्पनिले भिन्न बताएको छ । यो सोमा अन्य रियालिटी सोमा प्रतिभा देखाइसकेका 'स्टार प्रतिभा'ले मात्रै स्थान पाएका छन् ।  अन्य रियालिटी सोमा भाग लिइसकेका गायक गायिका र पाँच वर्षदेखि संगीत साधनामा लागेका गायक गायिकालाई मात्रै छनोट गरिएको निर्देशक रवि श्रेष्ठले बताए ।

हालसम्म जम्मा ६ एपिसोड प्रसारण भएको सांगीतिक रियालिटी सो ‘नेपाल्स सिङ्गिङ सुपरस्टार’ नेपाली रियालिटी सो प्रेमीहरु माझ छोटो समयमा नै लोकप्रियता बढाउँदै अघि बढेको छ । ‘ब्याटल अफ दि स्टार्स’को रूपमा इमेज एचडी टेलिभिजनबाट हरेक हप्ताको आइतबार र सोमबार बेलुका ७:४५ बजे प्रसारण भइरहेको यो कार्यक्रम निर्माण कम्पनीले छोटो समयमा रियालिटी सोप्रेमीमाझ लोकप्रिय बन्न सफल भएको बताएको छ ।

निर्णायकको रुपमा दर्शकहरु माझ चर्चित र प्रतिष्ठित निर्णायकहरु संजय श्रेष्ठ, सत्यराज आचार्य, स्वरुपराज आचार्य र मिलन नेवार रहनुलाई सफलताको पहिलो कडी निर्माण टिमले मानेको निर्देशक श्रेष्ठ बताउँछन् । निर्देशक श्रेष्ठले आफ्नो कार्यक्रम नेपालको मौलिक रियालिटी सो रहेको बताए ।

कार्यक्रममा प्रस्तोताको रुपमा टेलिभिजनको पर्दामा स्थापित होस्ट विवेकसिंह ठकुरी र केन्जल मेहर श्रेष्ठ छन् । हालसम्म प्रसारण भएका एपिसोडहरुमा प्रतिस्पर्धीहरुको गायन क्षमता पनि आकर्षणको अर्को कारण बनेको रियालिटी सो पारखीहरुको धारण छ । ३२ एपिसोडसम्म चल्ने यो प्रतियोगिताका विजेताले २५ लाख रुपैयाँ पुरस्कार पाउनेछन् ।