६ सहरमा स्ट्‍यान्डअप कमेडी टुर

काठमाडौँ-  युवा पुस्ताका चर्चित कमेडियनहरूले भ्रष्टाचार विराेधी सन्देशसहित देशका ६ सहरमा कार्यक्रम गर्ने भएका छन् ।  प्रमोसनल टुर असार ३१ गते चितवनको भरतपुरबाट सुरु भई भाद्र ५ गते काठमाडौँमा आइ टुङ्गिने छ । निर्माण पक्षले दिएको जानकारीअनुसार असार ३१ र ३२ गते चितवनको भरतपुर, श्रावण ६ र ७ बुटवल, श्रावण १३ र १४ पोखरा, श्रावण २० र २१ विराटनगर, श्रावण २७ र २८ हेटौँडामा र भाद्र ३, ४ र ५ गते काठमाडौंमा कार्यक्रम आयोजना हुनेछ ।

‘टेबल मुनिबाट’ नाम दिइएको प्रमोसनल कार्यक्रमलाई प्रदर्शाेन्मुख चलचित्र 'प्रकाश'ले सह प्रायोजन गरेको हो । कमेडियनको प्रस्तुतिका बीच  चलचित्रका नायक प्रदीप खड्काले चलचित्रको प्रचार गर्ने कार्यक्रम रहेको छ । टुरमा कमेडियनहरू आदर्श मिश्रा, आयुस श्रेष्ठ, एलेनजंग थापा, आशिष घिमिरे र पुजन अधिकारी सहभागी हुनेछन् ।  भाद्र १० गते प्रदर्शनमा आउने चलचित्रले प्रमोसनल कार्यक्रमका लागि बटुवा कमेडी र कमेडी टुकटुकसँग सहकार्य गरेको हो ।

दिनेश राउतको निर्देशन रहेको चलचित्रमा प्रदीप खड्का, दिया मास्के, रेणु योगी, प्रकाश घिमिरे, निरज पन्थी, गोविन्द सुनुवार, रामबाबु रेग्मी, लोकेन्द्र लेखक, दिपेन्द्र शाहीलगायतका कलाकारको अभिनय रहेको छ । बिनिस इन्टरटेनमेन्टको ब्यानरमा निर्माण भएको चलचित्रमा विकास सुवेदीको लेखन, राजेश श्रेष्ठको छायाँकन, जीवन थापाको सम्पादन, सुवास भुषाल, दिपक शर्मा, तारा प्रकाश लिम्बू र एलिस कार्कीको संगीत, उत्तम न्यौपानेको साउण्ड डिजाइन र शैलेश श्रेष्ठको पाश्र्व संगीत रहेको छ । महेन्द्र अधिकारी निर्माता रहेको चलचित्रलाई आरआर फिल्मस्का रोहित कट्टेल र रत्न श्रेष्ठले वितरण गर्दैछन् ।