आमिरको ‘लालसिंह चढ्ढा’ विदेशमा प्यारामाउन्टले वितरण गर्ने

मुम्बई- आमिर खान निर्मित तथा अभीनित ‘लाल सिंह चढ्ढा’लाई विदेशमा हलिउड वितरण कम्पनी प्यारामाउन्टले वितरण गर्ने भएको छ । यो त्यही कम्पनी हो जसले ‘फरेस्ट गम्प’ निर्माण गरेको थियो । टम ह्याङ्क्स अभीनित यही फिल्मलाई आमिर खानले रिमेक गरेका हुन् । 

यो फिल्म अगस्ट ११ मा रिलिज हुँदैछ । प्यारामाउन्टका वितरण विभागका कार्यकारी निर्देशक मार्क विन्स्टकले खबर पुष्टि गर्दै भारती चरित्र र संस्कृति दुनियाँका दर्शक सामु प्रस्तुत गर्न आफूहरू उत्साहित रहेको बताएका छन् । उनले ‘फरेस्ट गम्प’को भारतीय भर्सन दर्शकले पहिलेझैँ रुचाउने विश्वास व्यक्त गरेका छन् । 

आमिर खानले मुख्य भूमिका निर्वाह गरेको फिल्ममा करिना कपुर, नागा चैतन्य आदि कलाकारको अभिनय रहेको छ । फिल्मको केही दिनअघि मात्र चेन्नईमा ट्रायल सो भएको छ । फिल्म हेरिसकेपछि तेलगु फिल्मका सुपरस्टार चिरञ्जीवीले यो फिल्मको तेलगु भर्सन वितरण गर्ने सम्झौता गरेका छन् । कलाकार अतुल कुलकर्णीले लेखेको फिल्मलाई अद्धैत चन्दनले निर्देशन गरेका हुन् ।