‘रकी’ निर्मातासँग सिल्भस्टर स्टालोनको गुनासो, ‘ केही त मेरा छोराछोरीलाई पनि छाडिदेऊ’

लसएन्जल्स - ‘रकी’ अभिनेता सिल्भस्टर स्टालोनले यो फिल्मका निर्माताले आफूलाई पर्याप्त आर्थिक लाभ नदिएको गुनासो गरेका छन् । सिल्भस्टरले ‘रकी’का सिक्वेल तथा स्पिन अफ फिल्मबाट निर्माता इरविन विन्कलरले एकलौटी फाइदा लिएको गुनासो गरेका हुन् । 

उनले आइतबार इन्स्टामा ९७ वर्षीय निर्माताको चित्र राख्दै असन्तुष्टि व्यक्त गरेका हुन् । ‘ ४७ वर्षसम्म इरविनले रकीको भाग खाए र अहिले क्रिड । बितेर जानुअघि यो फिल्मबाट भइरहेको आम्दानी म मेरा छोराछोरीका लागि छाडेर जान चाहान्छु । मलाई आश, ९३ वर्षीय निर्मातालाई यसका लागि तयार हुनेछन्,’ सिल्भस्टरले लेखेका छन् । 

सिल्भस्टरले पछिल्लो समय आफ्ना हिट फिल्मको स्वामित्व आफूसँग नरहेकोमा गुनासो गर्न थालेका थिए । यसमा ‘रकी’ पनि पर्छ जुन बनाउन सिल्भस्टरको ठूलो मेहनत थियो । तर सन् १९७६ मा रिलिज भएको फिल्मले १० लाख अमेरिकी डलर लगानी गरेर २ करोड २५ लाख अमेरिकी डलर कमाइ गरेको थियो । यसका बावजुद आफूले बराबरी सेयर नपाएको सिल्भस्टरले गुनासो गर्दै आएका छन् । 

सन् २०१९मा सिल्भस्टरको मुखबाट यो कुरा सुनेपछि इरविन चकित परेका थिए । उनले ‘रकी’ र ‘क्रिड’बाट सिल्भस्टरले १० लाख अमेरिकी डलर सेयर लगेको र उनी आफैन् निर्माता पनि रहेको बताएका थिए । 

जबकि सिल्भस्टरले ‘रकी’माथि आफ्नो रत्तिभर पनि स्वामित्व नरहेको भन्दै चित्त दुखाएका थिए । ‘रकीमाथि मेरो केही अधिकार छैन ।  म मेरा सन्तानका लागि रकीको केही अंश छाड्न चाहान्छु,’ उनले अन्तर्वार्तामा भनेका थिए । सन् १९७६ मा रिलिज भएको फिल्मलाई सिल्भस्टरले आफैँ लेखेका पनि थिए ।  

'रकी' नाममै यो फिल्मका ५  सिक्वेल आएका थिए भने यही फिल्मको कथाको वरिपरि अरु फिल्म पनि बनेका थिए ।