डब्लुएचओले बाइडनसँग सहकार्य गर्ने

काठमाडौं : विश्व स्वास्थ्य संगठन (डब्लुएचओ)ले  अमेरिकाका नवनिर्वाचित राष्ट्रपति जो बाइडनसँग सहकार्य गर्ने इच्छा देखाएको छ । डब्लुएचओका महानिर्देशक टेड्रोस आधनाम गेब्रियोसले अमेरिकाका नवनिर्वाचित राष्ट्रपति बाइडेन तथा उपराष्ट्रपति कमला ह्यारिसलाई बधाई दिंदै सहकार्य गर्ने बताएका हुन् ।

उनले आइतबार ट्‍वीटमार्फत बधाई दिएका हुन् ।  'अमेरिकी राष्ट्रपति र उपराष्ट्रपतिमा विजयी हुनुभएकोमा तपाईँहरुलाई बधाई छ, म पनि यहाँहरु र यहाँको टिमसँग मिलेर काम गर्न इच्छुक छु,' उनले ट्‍वीटमा लेखेका छन् । 

अमेरिकाले विश्व स्वास्थ्य संगठनबाट निस्किने निर्णय गरेको थियो । यसप्रति संगठनले विगतदेखि नै दुःख व्यक्त गर्दै आएको छ । महानिर्देशक गेब्रियोसले  ट्‍वीटमा अमेरिकालाई डब्लुएचओमा फर्कन समेत आग्रह गरेका छन् । बाइडेनले आफूले राष्ट्रपतिको सपथ लिएपछि डब्लुएचओमा अमेरिका पुनः फर्किने बारेमा निर्णय गर्न सक्ने उल्लेख गरेका छन् ।