पानी अभाव झेल्दै किसान : चिरा पर्न थाले खेतका गह्राहरु

म्याग्दी । पानी अभाव झेल्दै रोपाइँ गरेका किसानहरुका खेतमा धाँजा फाट्न थालेको छ । रोपाइँ गरेका खेतमा पानी नभएकै कारण धाँजा फाट्न थालेको हो ।

म्याग्दीको बेनी नगरपालिका–६ चुत्रेनीमा वर्षा नभएपछि धाँजा फाटेर रोपो मर्न थालेको किसानहरुको भनाइ छ । यहाँका किसानहरुले केही दिनअघि गरेको रोपाइँपछि अहिले खेतका गह्रा चिरा–चिरा परेको छ । पानी अभावकै कारण रोपिएका धानहरु मर्न थालेपछि किसानहरु चिन्तामा छन् ।

मध्य बर्खा कटिसक्दा पनि पानी अभावका कारण म्याग्दीका खेतीयोग्य जमीनमा आधा पनि रोपाइँ हुन सकेको छैन । धान बाली लगाइने यहाँका कुल जमिनमध्ये ४० प्रतिशतमा पनि रोपाइँ हुन सकेको छैन ।