फोहर व्यवस्थापनबारे मेरो योजना प्रकाशमानको भोट बढ्छ भनेर कार्यान्वयन गरिएन : सिंह

काठमाडौँ - नेपाली कांग्रेसका नेता प्रकाशमान सिंहले काठमाडौं उपत्यकाको फोहर व्यवस्थापनको लागि आफूले विगतमा ल्याएको अवधारणा पालना नगरिएकाले अहिले अवस्था विकराल बनेको जिकिर गरेका छन् । बिहीबार काठमाडौँमा आयोजित एक कार्यक्रममा आफूले फोहर व्यवस्थापनको लागि ‘जिरो वेस्ट कन्सेप्ट’ ल्याए पनि प्रकाशमानको भोट बढ्छ भनेर त्यसलाई कार्यान्वयन नगरिएको उनले बताए । 

यसबाट आफूले मात्र राम्रो काम गर्न खोज्दासमेत जनताले समर्थन नगरे नहुँदो रहेछ भन्ने अनुभव हासिल गरेको उनले बताए ।

अर्को एक प्रसंगमा उनले राजनीतिक वा विकास निर्माणको काम मात्र नभई घरायसी समस्याबारे पनि आफूलाई जानकारी दिए समाधान गरिदिने आश्वासनसमेत उनले दिए । समस्याबारे जानकारी भए वडा, प्रदेश र प्रतिनिधि सभाका सबै तहका जनप्रतिनिधिहरु मिलेर समाधान गर्न तत्पर रहेको बताउँदै उनले भने, ‘तपाईंहरूको समस्या हामीलाई भन्नुपर्‍यो । हामीसँगै बसेर समस्यालाई समाधान गर्छौं ।’ 

काठमाडौंमा रहेको बेला बिजुलीबजारस्थित सम्पर्क कार्यालयमा शुक्रबार र सोमबार आफू पुग्ने गरेको भन्दै उनले कुनै समस्या आए आफूलाई जानकारी दिन आग्रह गरे ।