लोकतन्त्रमा आस्था राख्‍ने कांग्रेसी पत्रकारहरू ८ वर्षपछि नेता छान्‍दै

मकवानपुर- मकवानपुरको हेटौँडामा जारी प्रेस युनियनको ९औँ महाधिवेशनमा आज मतदान हुँदैछ । नेपाली कांग्रेसको शुभेच्छुक संगठन नेपाल प्रेस युनियनको चुनावी कार्यतालिका अनुसार आज बिहान ११ बजेबाट अपरान्ह ४ बजेसम्म मतदान हुँदैछ । हिजो उम्मेदवारी दर्ता गराएका दुई वटा प्यानलबीचमा आज मतदान हुने भएको हो । देशभरका ७७ जिल्लाबाट आएका एक हजार ६ सय ५० जना प्रतिनिधिहरूले आज मतदान गर्नेछन् । 

प्रेस युनियनको चुनावमा संस्थापन शेरबहादुर देउवा पक्षबाट अनिता बिन्दु र संस्थापन इतर समुह शेखर कोइराला समूहबाट शिव लम्‍सालको प्यानल चुनावी प्रतिस्पर्धामा लागेको छ । यसैगरी अध्यक्ष पदमा भुवन भट्टले पनि उम्मेदवारी दिएका छन् । प्रेस युनियनको वरिष्ठ उपाध्यक्ष पदमा एक पदको लागि दुई जनाले उम्मेदवारी छ । बरिष्ठ उपाध्यक्षमा प्रेम केसी र सरोज अधिकारीले उम्मेदवारी दिएका छन् । 

८ वर्षपछि हुन लागेको कांग्रेस निकट प्रेस युनियनको महाधिवेशन आगामी ३ वर्षको लागि ले नयाँ नेतृत्व चयन गर्नेछ । प्रेस युनियन केन्द्रमा पदाधिकारी, केन्द्रीय सदस्य र केन्द्रीय लेखा समिति समेत गरी १२० जनाको प्रतिनिधित्व रहनेगरी विधानमा व्यवस्था गरेको छ । जसमध्ये अध्यक्ष १, वरिष्ठ उपाध्यक्ष १, उपाध्यक्ष १२, महासचिव १, उपमहासचिव ६, सचिव १७, कोषाध्यक्ष १ र केन्द्रीय सदस्य ७६ जना समेत गरी कुल ११५ जना रहने व्यवस्था छ । 

त्यस्तै, केन्द्रीय लेखा समितिमा संयोजक १ र सदस्य ४ जना समेत गरी ५ सदस्य रहने व्यवस्था छ । यस्तै कुल १२० वटा पदमध्ये ११८ पदका लागि उम्मेदवारी परेको छ । दुई पदका लागि कुनै पनि मनोनयन दर्ता भएको छैन भने उम्मेदवारी परेका ३१ पदमा निर्विरोध निर्वाचित भएको घोषणा भइसकेको छ । 

मनोनयन दर्ता नभएको पदमा अल्पसंख्यक महिला कोटाको केन्द्रीय सदस्य र उपत्यका महिला कोटाको केन्द्रीय सदस्य पद रहेको छन् । अल्पसंख्यक महिला केन्द्रीय सदस्यतर्फ १ जनाको कोटामा कुनै पनि मनोनयन दर्ता भएन । उपत्यका प्रदेशको महिला केन्द्रीय सदस्यमा २ जनाको कोटामा १ जनाको मात्रै मनोनयन दर्ता भयो । बाँकी ८७ पदका लागि भने आज निर्वाचन हुँदैछ । यसका लागि १७३ जना उम्मेदवार चुनावी मैदानमा छन् । 

उपाध्यक्ष खुल्ला दुइ वटा पदमा चार जनाको उम्मेदवारी परेको छ । उपाध्यक्ष खुल्लामा राममणि दाहाल, नकुल अर्याल, भिष्मराज ओझा र शेखर रेग्मीले उम्मेदवारी  छ । उपाध्यक्ष समावेशी  पदमा भने संखुवासभाका दिपेन्द्र वान्तवा निर्बिरोध निर्वाचित भैसकेका छन्  ।

यसैगरी ११ जना अरु उपाध्यक्षका लागि दुई प्यानलबाट उम्मेदवारी दिएर प्रतिस्पर्धा हुने भएको छ । यसैगरी महासचिव पदमा जगन्नाथ दुलाल र दिलिप पौडेलबीचमा प्रतिस्पर्धा हुँदै छ । अध्यक्षदेखि सदस्यसम्म दुई प्यानलमा बिभाजित भएका छन् ।