आफ्नो जीवनीमा आफैँ फिल्म निर्माण र निर्देशन गर्दै मडोना

लसएन्जल्स-  पप गायिका मडोनाले आफ्नै जीवन कथामा बन्ने फिल्मको निर्देशन गर्ने भएकी छिन् । सांगीतिक श्रेणीको फिल्मको हाल धमाधम पटकथा लेखनको काम चलिरहेको छ । यसका लागि मडोना आफैँ पनि खटिइरहेकी छिन् । मडोनाले यो फिल्म इरिन क्रेसिडा विल्सनसँग मिलेर लेखिरहेकी छिन् । 

‘लेख्दा लेख्दै स्क्रिप्ट एकदमै लामो भएको थियो । अहिले छोटो बनाउन गाह्रो भइरहेको छ,’ भेराइटीसँगको कुराकानीमा मडोनाले भनेकी छिन् । फिल्ममा मडोनाको भूमिका जुलिया गार्नरले निर्वाह गर्ने चर्चा छ र मडोनाको साथीको भूमिका डेबी मजारले गर्दैछिन् । मडोनाले थपेकी छिन्, ‘मेरो जीवन असाधारण थियो र फिल्म पनि त्यस्तै हुनुपर्छ । अर्को कुरा, मैले मेरो जीवनीमा फिल्म बनाउन चाहाने कैयौँलाई रोकेकी छु । खासगरी स्त्रीद्धेषी निर्देशकलाई । त्यसैले म आफैँले यो जिम्मेवारी निर्वाह गर्न लागेकी छु । मेरो कथा अरु कसैले भन्दैन, म आफैँ भन्छु ।’

अहिलेसम्म नाम जुराइ नसकेको फिल्मले मडोनाको व्यक्तिगत जीवनसँगै सांगीतिक यात्राका क्षणलाई कैद गर्ने तयारी छ । फिल्म सन् २०२३को मध्यबाट सुटिङमा जाने तयारी छ ।