‘तेजाब’ रिमेकमा कार्तिक आर्यन र श्रद्धाको जोडी

मुम्बई- बलिउडमा रिमेक लहर धुमधामसँग चलेको छ । कोही दक्षिण भारतीय फिल्म रिमेक गर्ने लहरमा छन् कोही क्लासिक । अनिल कपुर र माधुरी दीक्षितको सुपरहिट फिल्म ‘तेजाब’ रिमेक हुने क्रममा रहेको छ ।

निर्माता मुराद खेतानीले यो फिल्मको रिमेक अधिकार लिएका छन् र यसका लागि उनले कार्तिक आर्यन र श्रद्धा कपुरको जोडी लिने बारे सोचिरहेका छन् । फिल्म गर्नलाई कार्तिक इच्छुक भए पनि श्रद्धाले भने जवाफ दिइनसकेको इन्डिया टुडेले स्रोतलाई उद्धृत गर्दै समाचार लेखेको छ । 

नयाँ शैलीमा बनाइने फिल्मका लागि निर्माता नयाँ जोडी राख्ने सोचमा श्रद्धा र आर्यनलाई  खेलाउन लागिपरेको समाचारमा उल्लेख छ । कार्तिक र श्रद्धाले अहिलेसम्म सँगै फिल्म गरेका छैनन् । दुवैको जोडी रोचक देखिने अपेक्षामा निर्माताले कार्तिकलाई मनाइसकेका छन् श्रद्धालाई प्रस्ताव गइसकेको छ ।

श्रद्धा पनि माधुरीले जीवन्त बनाएको भूमिका गर्न इच्छुक भए पनि गर्ने कि नगर्ने निर्णयमा पुगिसकेकी छैनन् । एन चन्द्राको निर्देशन रहेको फिल्म उसबेलाको ब्लकबस्टर फिल्म थियो ।