झापा, मोरङ र सुनसरीका खुला सीमा क्षेत्रमा लामो दुरीको प्रहरी गस्ती

विराटनगर - सिमावर्ती क्षेत्रबाट हुने चोरी तस्करी र अपराधजन्य गतिविधि नियन्त्रण गर्ने भन्दै नेपाल प्रहरीले प्रदेश १ का तीन जिल्ला झापा, मोरङ र सुनसरीमा लामो दुरीको गस्ती सुरु गरेको छ । १ नम्बर प्रदेश प्रहरी कार्यालय विराटनगरले सिमावर्ती क्षेत्रमा छुट्टाछुट्टै टोली परिचालन गरी गस्ती सुरु गरेको हो ।

खुल्ला सीमा नाकाको फाइदा उठाउँदै सीमावर्ती क्षेत्रबाट भइरहेका चोरी, तस्करी र अपराधहरूको रोकथाम तथा नियन्त्रण गर्न भन्दै भारतसँग सीमा जोडिएका क्षेत्रमा गस्तीमा प्रहरी परिचालन गरिएको  १ नम्बर प्रदेश प्रहरी कार्यालय विराटनगरका प्रवक्ता प्रहरी उपरीक्षक नविनराज राईले बताए ।

गस्ती टोलीलाई आवश्यक हातहतियार र सुरक्षा सामग्रीसहित पहिलो चरणमा श्रावण २० गतेदेखि सुरु गरेर बुधबारसम्म पाँच दिन गस्ती गरिएको जनाइएको छ । भारतसँगको खुल्ला सिमाना जोडिएका तीनवटै जिल्लामा छुट्टाछुट्टै टोली बनाई परिचालन गरिएको प्रवक्ता राईले जानकारी दिए ।

यसअघि सम्बन्धित जिल्ला र त्यस मातहतका सिमा क्षेत्रको प्रहरी र सशस्त्र प्रहरीले संयुक्त रुपमा सिमा क्षेत्रमा गस्ती गर्ने गरेको थियो । नेपाल प्रहरी एक्लैले पनि सिमावर्ती क्षेत्रमा गस्ती थालनी गरेको जनाइएको छ ।

प्रहरीले सुरु गरेको लामो दुरीको गस्तीले मातहत सीमावर्ती क्षेत्रमा कार्यरत प्रहरी कर्मचारीहरुलाई थप हौसला हुने र अपराधजन्य गतिविधि नियन्त्रणमा थप टेवा पुग्ने अपेक्षा गरिएको प्रहरीको भनाई छ । 

निरन्तर भइरहने गस्तीका साथै लामो दुरीको गस्तीमा सहभागी भएर आएका प्रहरीले दिने प्रतिवेदनका आधारमा सीमावर्ती क्षेत्रको सुरक्षा व्यवस्थाका लागि रणनीति बनाइने जनाइएको छ ।

भारतसँग खुल्ला सिमा जोडिएको क्षेत्र मोरङको मात्रै ६३ किलोमिटर र सुनसरीको ६२ किलोमिटर सीमाक्षेत्र भारतसँग जोडिन्छ । त्यस्तै झापाको ११८ किलोमिटर दक्षिणी सीमा क्षेत्र भारतकै विहार र पश्चिम बंगाल राज्यसँग जोडिएको छ ।