ईयु सहयोगको पुनरुत्थान र पुनर्निर्माण परियोजना समापन हुँदै

काठमाडौँ : युरोपेली महासंघ सहयोगको ‘नेपाल–ईयु एक्सन फर रिकभरी एण्ड रिकन्सट्रक्सन’ फेसेलिटीले नेपालको पुनर्निर्माणको सम्बन्धमा समीक्षा गरेको छ । शुक्रबार भएको समीक्षामा समग्रमा पुनरुत्थान र पुननिर्माणको सन्दर्भमा पुनर्निर्माण प्रशासनसहित विभिन्न पक्षमा छलफल गरेको हो ।यो परियोजनाको सम्बन्धमा मागमा आधारित तथा प्राविधिक सहयोग प्रदान गर्ने निकट साझेदारका सम्बन्धमा अधिक प्रभावकारी र सञ्चालनका जटिलताका विषयमा छलफल भएको थियो । यो परियोजनाले राष्ट्रिय पुनर्निर्माण प्राधिकरण र राष्ट्रिय विपद् जोखिम न्यूनीकरण तथा व्यवस्थापन प्राधिकरणसँग काम गरेको छ ।

यो परियोजनाले विगत चार वर्षमा पुनर्निर्माण र पुनरुत्थानका विविध क्षेत्रमा राष्ट्रिय तथा अन्तर्राष्ट्रिय परामर्शदाताद्वारा परामर्श सेवा प्रदान गरेको थियो । यस परियोजनामा आकस्मिक दायित्व स्वरूप वृद्धि भएको बजेटका सम्बन्धमा पनि लचकता अपनाइएको थियो । अनुभव बाँड्ने, चुनौती विश्लेषण तथा कार्यक्रम, अनुगमन तथा मूल्यांकन र प्रस्तुतीमा सिफारिश तथा आधिकारिक हस्तान्तरण जस्ता गतिविधि गरिएका थिए । 

नेपालका लागि ईयुका राजदूत नोना देप्रेजले पुनर्निर्माणका क्षेत्रमा हासिल भएका प्रगतिका सम्बन्धमा राष्ट्रिय पुनर्निर्माण प्राधिकरण र राष्ट्रिय विपद् जोखिम न्यूनीकरण तथा व्यवस्थापन प्राधिकरणलाई बधाई दिदैं नेपालमा पुनर्निर्माणका कामको स्तरोन्नति भएको बताएकी छिन् । नेपालको पुनर्निर्माणमा ‘बिल्ड ब्याक बेटर’ ले गति लिएको उल्लेख गर्दै राजदूतले यसले जोखिमयुक्त समुदाय र आम नेपालीहरूलाई लाभान्वित बनाएको बताइन् ।

सन् २०१५ को महाभूकम्पपछि ईयुले नेपाल र नेपाली जनतालाई राहत, पुनरुत्थान र पुननिर्माणका माध्यमबाट सघाएको छ । ईयुले नेपाललाई ९ करोड युरो सहयोग गरेको थियो । ‘रिकन्स्ट्रक्सन फेसेलिटी’ स्थापनाका लागि जर्मन कन्सल्टिङ ग्रुप, जीएफएसँग करार गरिएको थियो । समीक्षा कार्यक्रममा नेपालस्थित युरोपेली महासंघको प्रतिनिधिमण्डल, विकास साझेदार, राष्ट्रिय पुनर्निर्माण प्राधिकरण, राष्ट्रिय विपद् जोखिम न्यूनीकरण तथा व्यवस्थापन प्राधिकरण, प्रधानमन्त्री कार्यालय, अर्थ मन्त्रालय र पुरातत्व विभागका अधिकारीरू सहभागी थिए ।