यस्तो देखियो विराटनगरको ऐतिहासिक राधाकृष्ण रथयात्रा (फोटोफिचर)

विराटनगर- विराटनगरको ऐतिहासिक राधाकृष्ण रथयात्रा यस वर्ष भव्यताका साथ आयोजना गरिएको छ । विराटनगर-१ स्थित राधाकृष्ण मन्दिरबाट शनिबार अपरान्ह ३ बजे छोटो रूट बनाएर निकालिएको रथयात्रा मेनरोड हुँदै रोडषेश चोकबाट महेन्द्र चोक र बरगाछी पुर्‍याएर पुनः राधाकृष्ण मन्दिरमा गएर समापन गरिने छ ।

भिड महामारीले दुई वर्षदेखि रोकिएको रथयात्रालाई यसपटक स्वास्थ्य मापदण्ड अपनाएर निकाल्ने सहमति पश्चात छोटो तयारीमा रथयात्रा आयोजना गरिएको थियो । रथयात्रामा हजारौं भक्तजनहरूको सहभागिता देखिएको छ ।

वि.सं. १९८८ मा खट यात्राबाट सुरू भएर २०२४ सालदेखि विराटनगरमा श्रीकृष्ण जन्माष्टमीको भोलिपल्ट प्रत्येक वर्ष राधाकृष्ण रथयात्रा निकालिँदै आएको छ । विगत दुई वर्ष कोभिड महामारीका कारण झाँकीरहित खटयात्रा निकालिएको थियो । यस वर्षदेखि रथयात्रालाई नै निरन्तरता दिइएको हो ।

रथ तान्नका लागि नेपाल प्रहरीको तालिमरत महिला र पुरुष जवानहरू तथा आयोजक समितिले खटाएका स्वयंसेवकहरू परिचालन गरिएको छ । रथलाई विभिन्न २२ स्थानमा रोकेर श्रद्धालु भक्तजनहरूलाई राधाकृष्ण रथ यात्राको लठ्ठा तान्ने र दर्शन गराउने व्यवस्था मिलाइएको आयोजक समितिले जनाएको छ । विराटनगरको राधाकृष्ण रथ यात्रालाई भारतको जगन्नाथपुरीको रथ यात्रापछि एशियाकै ठूलो रथयात्रा मानिँदै आएको छ ।