तिहारमा तीन दिन बैंक नखुल्ने

काठमाडौँ  : तिहारमा तीन दिन बैंक नखुल्ने भएका छन् । वाणिज्य बैंकहरुले तिहारको बिदामा आफ्ना शाखाहरू नखोल्ने भएका छन् । सरकारले दिएको सार्वजनिक बिदाको समयमा बैंक तथा वित्तीय संस्थाका सबै काउन्टर बन्द हुने नेपाल बैंकर्स संघले जनाएको छ । कोभिड-१९ को संक्रमण बढ्दै गएपछि बैंकहरूले तीन दिन बन्द गर्ने निर्णय गरेका हुन् ।  

वाणिज्य बैंकहरूको छाता संगठन बैंकर्स संघले सीमित शाखा खोलेर बैंकिङ सेवा दिँदा कोरोना सर्ने जोखिम बढ्ने सम्भावना भएको भन्दै नखोल्ने निर्णय गरेको जनाएको छ । स‌ंघका प्रमुख कार्यकारी अधिकृत अनिल शर्माले कात्तिक २९ देखि मंसिर १ गतेसम्म गरी तीन दिन बैंकका शाखाले नखुल्ने जानकारी दिए । 

अहिले बैंकहरूले एटिएम तथा डिजिटल कारोबारलाई प्राथमिकतामा राख्दै आएका छन् । तिहारमा पनि डिजिटल बैंकिङलाई प्रोत्साहन गरी शाखा खोलेर दिने सेवालाई  बन्द गरेको शर्माले बताए ।

संघले  कोभिड संक्रमणबाट बच्‍न तथा जोखिम न्यूनीकरणका लागि डिजिटल बैंकिङ, मोबाइल बैंकिङ, इन्टरनेट बैंकिङ र एटिएम सेवाको अधिकतम प्रयोग गर्न आग्रह गरेको छ । गत वर्ष दशैँ तथा तिहारको बिदामासमेत सिमित बैंकका काउन्टरमार्फत सेवा प्रवाह गरेका थिए ।