हेटौंडा उपमहानगर : सय दिनको सम‍ीक्षामा गुनासाका चाङ

मकवानपुर- स्थानीय तह निर्वाचन २०७८ मा गठबन्धनबाट चुनाव जितेर आएपछिको सय दिनमा भएका प्रगतिबारे जानकारी गराउन आयोजित कार्यक्रममा हेटौंडा उपमहानगर प्रमुख मिनाकुमारी लामाले गुनासोको बेलीविस्तार लगाइन् ।

नगरप्रमुख भएर आएपछि नगरपालिकाको कार्य प्रगतितर्फभन्दा आफन्तलाई चित्त बुझाउन अग्रसर भएको आरोपप्रत्यारोप खेपिरहेकी लामाले आफैँले आयोजना गरेको कार्यक्रममा आफूमाथि लागेको गुनासाहरू आफैँ सार्वजनिक गरिन् ।

लामाले भ्रष्टाचारको आरोपमा जनप्रतिनिधिलाई असफल बनाउने खेल भएको आरोप लगाइन् । लामाले अख्तियार दुरुपयोग तथा अनुसन्धान आयोगमा बेनामी र फर्जी उजुरी हालेर जथाभावी भ्रष्टाचार भएको भन्ने आरोप हेटौंडा उपमहानगरमाथि लगाइएको बताइन् । भ्रष्टाचार भएको प्रमाणित भए आफू हदैसम्मको कारबाही भोग्न तयार रहेको लामाले जिकिर गरिन् ।

लामाको नेतृत्व आएपछि मात्रै हेटौंडा उपमहानगरपालिकामा ६० वटाभन्दा बढी उजुरी परिसकेको छ ।

हेटौंडा उपमहानगरपालिकाले एक सय दिनको प्रगति प्रतिवेदन सार्वजनिक गर्न कार्यक्रम गरेको थियो । उपमहानगरपालिकाले  हेटौंडामा पत्रकार सम्मेलन गरेर आफूले अगाडि बढाएको कार्यबारे जानकारी दिएको हो ।

उपमहानगरपालिकाले यस अवधिमा प्रत्येक घरधुरीलाई दश हजार लिटर खानेपानी निः शुल्क वितरण सुरू गरेको, उपमहानगरका अतिविपन्‍न १५४१ परिवारलाई स्वास्थ्य बीमा गरिएको नगरप्रमुख लामाले जानकारी दिइन् । यसैगरी नगरमा तीनपांग्रे सवारी पार्किङ व्यवस्थापनको पहल स्वरुप स्टिकर टास्ने कार्य सुरू गरेकाे लामाले बताइन् ।

नगरपालिकाले हालसम्म मयुरी ३०३ र अटो १ हजार १२२ गरी जम्मा १ हजार ४२५ तीन पांग्रे सवारीमा स्टिकर टाँसेको छ । यसैगरी रेडक्रससँग सम्झौता गरी चालू आर्थिक वर्षमा नगरवासीहरूलाई निःशुल्क रक्तसेवालाई नवीकरण गरिएको जनाएको छ ।

यो सेवा अघिल्लो आर्थिक वर्षमा नै निर्णय भएको थियो । लामाको कार्यकाल सुरू भएपछि हटिया र पदमपोखरी स्वास्थ्य चौकीको स्तर वृद्धि गरी आधारभूत अस्पतालको रूपमा सञ्चालन गरी हाललाई ओपीडि, प्रयोगशाला र स्वास्थ्य बीमाको औषधि वितरण गर्ने प्रयोजनका लागि चिकित्सक भर्ना प्रक्रिया र बीमा सेवा अनुमति प्रकृया अगाडि बढाइएको जनाएको छ ।