तीन परियोजनाको ३८.६८ अर्ब लगानी स्वीकृत

काठमाडौं : प्रधानमन्त्री केपी शर्मा ओलीको अध्यक्षतामा मंगलबार साँझ बसेको लगानी बोर्डको ४५ औं बैठकले तीन जलविद्युत् परियोजनाको ३८.६८ अर्ब  रुपैँया लगानी स्वीकृत गरेको छ । सार्वजनिक निजी साझेदारी (पीपीपी) अवधारणामा कार्यान्वयन हुन लागेका ७७.५ मेगावाट क्षमताको घुन्साखोला जलविद्युत् परियोजनाका लागि १७ अर्ब ६२ करोड ४० लाख रुपैँया, ५७ मेगावाटको हिमचुली दोर्दी जलविद्युत् परियोजनाका लागि १० अर्ब ६१ करोड ९१ लाख रुपैँया र ६५ मेगावाट क्षमताको दुधखोला जलविद्युत् परियोजनाका लागि १० अर्ब ४३ करोड ६० लाख रुपैँया लगानी स्वीकृत भएको लगानी बोर्डको कार्यालयले जानकारी दिएको छ ।  

यसका साथै बोर्ड कार्यालयको क्षमता अभिवृद्धि तथा संस्थागत विकासका लागि परियोजना बैंक र विभिन्न सरोकारवाला निकायसँग परामर्श गरी बोर्डको रणनीतिक योजना तयार गर्नेबारे प्रधानमन्त्री तथा बोर्ड सदस्यहरुलाई ब्रिफिङ गरिएको थियो । बैठकमा प्रमुख कार्यकारी अधिकृत सुशील भट्टले बोर्डमार्फत् प्रवद्र्धन भएका र सहजीकरण गरिएका परियोजनाहरुको कार्यान्वयनको अवस्थाबारे जानकारी गराएका थिए । लगानीकर्तालाई एकल बिन्दु सेवा केन्द्रद्वारा  सहज र शीघ्र सेवा प्रदान गर्न उक्त केन्द्रलाई स्वचालित बनाउने र नलेज म्यानेजमेन्ट पोर्टल स्थापना र उपयोग गर्ने बारे पनि छलफल भएको लगानी बोर्डको कार्यालयले जनाएको छ ।

कोभिड–१९ का कारण यसअघि बोर्ड बैठक प्रभावित भएकोमा अब नियमित बैठक हुने प्रधानमन्त्रीलाई उद्धृत गर्दै बोर्डका नवनियुक्त सीईओ भट्टले बताए । बैठकमा प्रधानमन्त्रीले उर्जा उत्पादनका साथै उत्पादित विद्युत् खपतको योजना तयार गर्न समेत निर्देशन दिएका थिए ।