‘केही नेपाल ऐन संशोधन गर्ने विधेयक, २०७९’ पारित

काठमाडौँ- प्रतिनिधि सभा र प्रदेश सभाको कार्यकालको व्यवस्थालाई हटाएर ‘केही नेपाल ऐन संशोधन गर्ने विधेयक, २०७९’ पारित भएको छ ।

मंगलबार बसेको प्रतिनिधि सभा बैठकले बहुमतले उक्त विधेयकलाई पारित गरेको हो । विधेयकमा रहेको कार्यकालसम्बन्धी प्रस्तावमा सांसदहरूले विरोध गर्दै संशोधन प्रस्ताव हालेका थिए । त्यसमा कानुनमन्त्री गोविन्द शर्मा कोइरालाले संशोधन प्रस्ताव स्वीकार गरेका थिए ।

त्यसअघि बैठकमा सांसदहरूले उठाएका प्रश्नको जवाफ दिँदै कानुनमन्त्री गोविन्दप्रसाद शर्मा कोइरालाले संविधानको व्यवस्थाअनुसार नै प्रतिनिधि सभा र प्रदेश सभाको कार्यकालका सम्बन्धमा व्यवस्था गर्न खोजिएको बताए । उनले कार्यकालका सम्बन्धमा अनावश्यक राजनीति गरिएको भन्दै कानुनी रिक्तता र अभाव परिपूर्ति गर्ने सोचका साथ प्रतिनिधि सभा र प्रदेश सभाको कार्यकालको प्रबन्ध गर्न खोजिएको धारणा राखे । उनले सरकारले पवित्र उद्देश्यका साथ विधेयक ल्याएको भए पनि फरक बुझाई रहेका कारण यसलाई अघि संसदको कार्यकालको विषयलाई थप अघि नबढाउन प्रधानमन्त्रीबाटै निर्देशन प्राप्त भएको जानकारी दिए ।

उनले संसद्‍को कार्यकालका विषयमा उल्लेख दफाहरूलाई हटाउने प्रस्तावलाई सरकारले स्वीकार गरेको पनि बताए ।

प्रतिनिधि सभाको अर्को बैठक यही भदौ २२ गते बुधबार १ बजे बस्नेछ ।