दाङ दुर्घटना : मृतकका आफन्तद्वारा पूर्वपश्‍चिम राजमार्ग बन्द

बुटवल : ट्रकको ठक्करवाट तीन जना किशोरको मृत्यु भएपछि आफन्तले पूर्वपश्चिम राजमार्ग अन्तरगत दाङको मौरीघाटमा बाटो बन्द गरेका छन् ।  राजमार्ग अवरुध्द हुँदा गन्तव्यमा हिडेका सवारी साधन सडकमै रोकिएका छन् ।

पूर्वपश्चिम राजमार्ग अन्तरगत राप्ती गाउँपालिका-४ मौरीघाटमा दुर्घटना पछि पल्टिएको ट्रक बुधवार बिहान प्रहरीले उठाउन खोजेपछि आक्रोसित आफन्तले राजमार्ग बन्द गराएका हुन् । दुर्घटना पछि मृतक ३ जना किशोरको मुचुल्का नउठाइ शव उठाएको भन्दै आक्रोश व्यक्त गरेका छन् ।
 
प्रहरी अधिकारीहरूले भने मृतकका आफन्तले उचित क्षतिपूर्तिको माग गर्दै राजमार्ग बन्द गराएको बताएका छन् । छलफल मार्फत राजमार्ग खुलाउन प्रयास भइरहेको बताएको प्रहरीको भनाइ छ । 

दुर्घटना पछि फरार भएका ट्रक चालक कपिलबस्तुको गोरुसिंगेमा प्रहरी सम्पर्कमा आएका छन् । पक्राउ परेका चालकलाई दाङ ल्याउन लागिएको जिल्ला प्रहरी कार्यालय दाङका प्रवक्ता डिएसपी सुमित खड्काले जानकारी दिए । 

ट्रक मालिक भैरहवाबाट सम्पर्कमा आएको र उनीपनि समस्या समाधानका लागि दाङ आउन लागेको हुँदा छिट्टै समस्या समाधान हुने प्रवक्ता खड्काले बताए । मृतक तीन जना किशोरको शव पोष्ट मार्टमको लागि लमही अस्पतालमा राखिएको छ । एउटै मोटरसाईकलमा सवार उनीहरुको मंगलबार बेलुका पौने ८ बजेतिर ट्रकको ठक्करवाट मृत्यु भएको थियो ।