कोभिड-१९ नियन्त्रणबारे उपत्यकाका १८ मेयरसँग उपप्रधानमन्त्रीको छलफल

काठमाडौं : उपप्रधानमन्त्री ईश्वर पोखरेलले कोभिड-१९ नियन्त्रण गर्न मन्त्रिपरिषद्ले चालेको कदमबारे स्थानिय तहलाई जानकारी गराएका छन् । पोखरेलले मन्त्रीपरिषदको कार्यालय सिंहदरबारमा उपत्यकाका १८ स्थानिय तहका प्रमुख (मेयर) बोलाएर जानकारी गराएका थिए । केन्द्र सरकार र स्थानिय तहको सहकार्यको लागि भन्दै सरकारले चालेको कदमबारे उपप्रधानमन्त्री पोखरेलले जानकारी गराएका थिए । 

काठमाडौं र ललितपुरका मेयर सहित कोभिड-१९ संकट ब्यवस्थापन केन्द्र (सीसीएमसी) निर्देशक समितिका संयोजकसमेत रहेका पोखरेलले उपत्यकामा देखिएको महामारीको बढ्दो चापको बारेमा छलफल भइरहेको पोखरेलको सचिवालयले जनाएको छ । कोभिड रोकथाम र उपचारको क्रममा देखा परेको समस्या लगायतको विषयमा छलफल भएको थियो ।
 
छलफल सकिनै लाग्दासमेत भक्तपुरको मेयर भने सहभागि भएका थिएनन् । समस्या बढ्दै गएको तर यसको नियन्त्रण हुन नसकेको विषयमा त्यहाँ छलफल भएको हो । 
पछिल्लो समयमा कोरोना रोकथाम, नियन्त्रण र उपचार गर्ने सन्दर्भमा सबै मेयरहरुले आफूले गरेको प्रयासबारे जानकारी गराएका थिए । 

उनीहरुले रोकथामका लागि गरिएको प्रयास, सहकार्य र सरकारको निर्देशन बारे छलफल गरेका हुन् । उनीहरूले परेको समस्याको बारेमा पनि उपप्रधानमन्त्रीलाई जाकारी गराएका थिए । छलफलमा सुरक्षा निकायका अधिकारीहरुको उपस्थिति पनि थियो ।