डेंगु संक्रमण भएपछि मोरङ कांग्रेसका दुई उम्मेदवार अस्पताल भर्ना

विराटनगर- मोरङमा सत्ता गठबन्धनबाट प्रदेशसभा सदस्यको उम्मेदवार बनेका दुईजनालाई डेंगु संक्रमण भएपछि अस्पताल भर्ना भएका छन् । क्षेत्र नम्बर ३ को प्रदेशसभा (१) का उम्मेदवार शेखरचन्द्र थापा र क्षेत्र नं. ४ को प्रदेशसभा (१) का गुरुराज घिमिरेलाई डेंगु संक्रमण पुष्टि भएको जनाइएको छ ।

उनीहरू दुवै विराटनगरस्थित नोवेल मेडिकल कलेजमा उपचारका भर्ना भएका छन् ।

चार दलीय गठबन्धनबाट प्रदेशसभामा उम्मेदवार बनेका दुवै जना कांग्रेसका हुन् । 

घिमिरेले डेंगु संक्रमणका कारण ज्वरो आएकै अवस्थामा निर्वाचन अधिकृतको कार्यालयमा पुगेर मनोनयन दर्ता गरेका थिए ।

उनी मनोनयन दर्ता सकेर अस्पतालमा भर्ना भएका हुन् ।

त्यस्तै थापाले पनि डेंगु संक्रमणका कारण उपचारका लागि अस्पतालमा बस्नु परेको भन्दै घरदैलोमा पुगेर भोट माग्‍न नपाएकोमा दु:ख व्यक्त गरेका छन् ।

उनले बाध्यताले अस्पताल बस्नु परेको भन्दै पार्टीका नेता कार्यकर्ताहरूलाई चुनावी अभियानमा खटिदिनसमेत आग्रह गरेका छन् ।