मलयाली अभिनेता पृथ्वीराजको ‘खलिफा’ नेपालमा सुटिङ हुने

काठमाडौँ - मलयाली अभिनेता पृथ्वीराज सुकुमारनको फिल्म ‘खलिफा’ नेपालमा पनि सुटिङ हुने भएको छ । भारतीय मिडियामा आएको समाचारअनुसार थ्रिलर श्रेणीको यो फिल्मको केरला र दुबईसँगै नेपालमा पनि सुटिङ हुने भएको हो । निर्माण टिमले ठूलो बजेटमा निर्माण हुन लागेको फिल्मको सुटिङ चाँडै नै सुरु गर्ने जनाएको छ । निर्माण टिमले फिल्मका लागि नेपालको लोकेसन तय गरिसकेको छ । 

निर्माण टिमले केही दिनअघि ४० औँ जन्मदिन मनाएका पृथ्वीराजको जन्मदिनको अवसर पारेर फिल्मको पोस्टरसँगै बाँकी जानकारी सार्वजनिक गरेको थियो । यो फिल्मलाई भ्यसाखले निर्देशन गर्दैछन् जसले १० वर्षअघि पृथ्वीराजलाई नै लिएर ‘पोकरी राजा’ बनाएका थिए । बक्स अफिसमा यो फिल्म सुपरहिट मानिएको थियो ।
केही दिनअघि तेलगु फिल्म ‘गडफादर’ पनि नेपालमा सुटिङ गर्ने चर्चा चलेको थियो । निर्माण टिम नेपालमा लोकेसन हेर्न पनि आएको थियो तर लोकेसन चित्त नबुझेपछि फर्किएको थियो ।