‘नाइँ नभन्नू ल ६’ फ्लोरमा, निखिल–सञ्चिता पुत्र अथर्वको डेब्यू

काठमाडौँ - ‘नाइँ नभन्नू ल ६’ बिहीबारदेखि फ्लोरमा निस्किएको छ । काठमाडौँको सुन्धारा मल स्थित डाडुपन्यू रेष्टुरेन्टबाट निर्देशक विकासराज आचार्यलाई फिल्मको सुटिङ सुरु गरेका हुन् । पहिलो दिन आशिर्वाद क्षेत्री, अथर्व लुइँटेल र एभलिना खड्काले फिल्मका लागि सट दिए । अथर्व लुइँटेल अभिनेत्री निखिल उप्रती र अभिनेत्री सञ्चिता लुइँटेलका छोरा हुन् । 

दसैँ तिहारको बिदाको मौका छोपी फिल्मको सुटिङ सुरु गरिएको हो । तिहारअघिको सेड्युलमा बाल कलाकार सम्मिलित सुटिङ सक्ने निर्माण टिमको लक्ष्य छ । फिल्ममा केमियो गरिरहेका अनुभव रेग्मीले यही बीचमा आफ्नो भागको सुटिङ सक्नेछन् । 

यो फिल्मबाट मुख्य अभिनेतामा आशिर्वाद क्षेत्रीले पनि डेब्यू गर्दैछन् । नृत्यमा राम्रो दख्खल राख्ने आशिर्वाद फिल्ममा आँचल शर्माको अपोजिटमा देखिनेछन् । 
फिल्मको सुटिङ काठमाडौँबाहेक झापामा पनि हुनेछ । काठमाडौँमा बाल कलाकारको सुटिङ सकेपछि तिहार लगत्तै युनिट झापा प्रस्थान गर्नेछ । 
विकास आचार्यको निर्देशन रहेको फिल्मलाई पुरुषोत्तम प्रधानले खिचिरहेका छन् ।