सुर्खेतमा ८६ जना नयाँ कोभिड संक्रमित थपिए

सुर्खेत : सुर्खेतमा ८६ जना नयाँ कोभिड संक्रमित थपिएका छन् । बुधवार ८८ जनाको कोभिड परीक्षण गर्दा ८६ जनामा पोजेटिभ देखिएको छ । परीक्षण गरेका सबैजसोलाई कोभिड पोजेटिभ देखिएको जिल्ला जनस्वास्थ्य कार्यालयका प्रमुख चेतननिधि वाग्लेले जानकारी दिए ।

‘सुर्खेतका विभिन्न स्थानका ८८ जनाको मंगलवार पिसिआर परिक्षण गराएका थियौ,’ जनस्वास्थ्य प्रमुख वाग्लेले भने, ‘आज उहाँहरू सबैजसोको रिपार्ट पोजेटिभ आएको छ ।’ सुर्खेतस्थित पशुपंक्षी अन्वेषण प्रयोगशालामा उनीहरुको परिक्षण भएको हो । यसअघि सुर्खेतमा एक सय २० संक्रमित थिए । हाल सुर्खेतमा दुई सय ६ जना संक्रमित भएका छन् । 

कोभिड संक्रमितको संख्या बढ्दै गएपछि अस्पतालहरु पनि भरिन थालेको वाग्लेले बताए । हालसम्म सुर्खेतमा कोभिडका कारण २३ जनाको मृत्यु भएको छ । भारतबाट फर्किनेको संख्या बढ्दै गएपछि कोभिड संक्रमितहरू बढ्दै छन् ।