नेपालगञ्‍ज आइसीपीको शिलान्यास आज

काठमाडौं : नेपालको प्रमुख व्यापारिक नाका नेपालगन्ज एकीकृत जाँचचौकी (आइसीपी) को आज शिलान्यास हुने भएको छ । भारत सरकारको सहयोगमा निर्माण हुने उक्त जाँचचौकी दुई वर्षभित्र निर्माण सम्पन्न गर्ने लक्ष्य राखिएको परियोजनाको परामर्शदाता राइट्स इण्डिया लिमिटेडले जनाएको छ ।

नेपाल र भारतबीचका प्रमुख व्यापारिक नाकामा एकीकृत जाँचचौकी निर्माण गर्ने सम्बन्धमा सन् २००५ मा सम्झौता भएको थियो । भारतको विदेश मन्त्रालयको सहयोगमा कार्यान्वयन गर्नेगरी वीरगन्ज, विराटनगर, भैरहवा र नेपालगन्जमा आइसीपी निर्माण गर्ने सहमति भएकोमा भारतले वीरगन्ज र विराटनगरमा भने निर्माण सम्पन्न गरिसकेको छ । वीरगन्जको आइसीपी २०७४ चैतको मध्यदेखि र विराटनगर आइसीपी गत वर्ष माघदेखि सञ्चालनमा आएका हुन् ।

अन्तर्राष्ट्रिय व्यापारलाई व्यवस्थित गर्न यस्ता सीमा पूर्वाधारले महत्वपूर्ण भूमिका निर्वाह गर्दै आएका छन् । विश्व बैंकको व्यवसाय गर्ने वातावरणमा सहजता सम्बन्धि प्रतिवेदन, डुइङ विजनेस, २०२० ले वीरगन्जमा आइसीपी सञ्चालनमा आएपछि अन्तर्राष्ट्रिय व्यापार सहजीकरणमा मद्दत पुगेको उल्लेख गरेको छ ।

व्यापार सहजीकरणसम्बन्धि सूचकांकमा नेपाल १९० देशमध्ये ६०औं स्थानमा उक्लेको छ । आइसीपी सञचालनले नेपालमा आयात गर्दा भन्सार जाँचपास लगायत बोर्डर क्लीयरेन्समा औसत ५८ घण्टा लाग्ने गरेकोमा आइसीपी सञ्चालनमा आएसँगै ११ घण्टामा झरेको उल्लेख गरेको छ । त्यस्तै, निर्यातमा पनि बोर्डर क्लीयरेन्समा ३० घण्टा लाग्ने गरेकोमा ११ घण्टा लाग्ने गरेको उल्लेख छ ।