डेनमार्कको फिल्म फेस्टिभलमा जुरी बनेका शिव पुरी भन्छन्, ‘गज्जब ज्ञान पाइयो’

काठमाडौँ -तीन दर्जन बढी नेपाली फिल्म सम्पादन गरेका शिव पुरीले डेनमार्कको ‘ब्रेइजनिङ फिल्म फेस्टिभल’मा निर्णायकको जिम्मेवारी पूरा गरेका छन् । पुरी डेनमार्कमा हप्ता दिनसम्म चलेको फेस्टिभलमा विश्वका प्रतिष्ठित फिल्ममेकरसँगै बसेर निर्णायकको जिम्मेवारी पूरा गरेका हुन् । फेस्टिभल अक्टोबरको दुई देखि ९ तारिखसम्म चलेको थियो । थुप्रै डकुमेन्ट्रीको निर्माण तथा सम्पादन गरेका पुरीले प्रतिष्ठित फिल्म फेस्टिभलमा निर्णायक बन्दाको अनुभव सुखद रहेको बताएका छन् । 

‘जुरीको रुपमा विश्वका सयभन्दा बढी फिल्म हेरियो । यसले विश्व सिनेमासँग एकै पटक नजिक हुने अवसर दिलायो । त्योसँगै फेस्टिभल नै कसरी गर्न सकिनेरैछ भन्ने कुरा पनि यो क्रममा थाहा भएँ,’ उनले भने, ‘भविष्यमा यो ज्ञान नेपाली चलचित्रमा पनि प्रयोग गर्न सकिन्छ भन्ने लागेको छ ।’

शिव र निर्णायकको टोली सयबढी फिल्मबाट ३५ फिल्म सर्टलिस्ट गरेको थियो । यसरी सर्टलिस्ट भएका फिल्मलाई युरोपका विभिन्न ठाउँमा देखाइएको थियो । देखाइएका ठाउँबाट प्राप्त प्रतिक्रिया निर्णायकले दिएको अंक जोडेर विभिन्न विधाका फिल्मलाई विजेता घोषणा गरिएको थियो । 

शिव पुरीले अनलाइन आवेदन दिएर निर्णायकको रुपमा छानिएको इकागजलाई जानकारी गराएका छन् । उनका अनुसार फेस्टिभलले जुरी बन्न इच्छुकका लागि ओपन कल गरेको थियो । यही सूचना आधारमा उनले आवेदन दिए र फिल्ममा काम गरेको पृष्ठभूमि हेरर आफूलाई छानेको उनको भनाइ छ । 

‘जुरीका लागि उनीहरूले सूचना निकालेका थिए । मैले आफ्नो बायोडेटासहित जुरी बन्न इच्छुक रहेको निवेदन दिएको थिएँ । उनीहरूले छानेर सो जिम्मेवारी दिए,’ उनले भने ।निर्णायकले फिल्म फ्रिवेमा प्राप्त फिल्म हेर्दै अंक दिँदै पठाएका थिए । यो क्रममा तीन महिना लागेको उनले बताएका छन् ।