चित्रबहादुर केसीको उपचार खर्च सरकारले व्यहोर्ने

काठमाडौ : राष्ट्रिय जनमोर्चाका अध्यक्ष चित्रबहादुर केसीको उपचार खर्च सरकारले बेहोर्ने भएको छ । अर्थमन्त्री विष्णु पौडेलले केसीको उपचारमा लाग्‍ने सम्पूर्ण खर्च सरकारले व्यहोर्ने निर्णय गरको जानकारी दिए । मन्त्री पौडेलका अनुसार मन्त्रिपरिषद्को बिहीबार बसेको बैठकले केसीको उपचारमा लाग्‍ने खर्च बेहोर्ने निर्णय गरेको हो ।  

केसीलाई बुधबार कोभिड-१९ को संक्रमण देखिएको थियो । त्यसपछि उनलाई बुधबारै ललितपुरको मेडिसिटी अस्पतालमा भर्ना गरिएको छ । केहीदिनदेखि स्वास्थ्यमा समस्या देखिएपछि ८० वर्षीय केसीको पीसीआर परीक्षण गरिएको थियो । 

राष्ट्रीय जनमोर्चाका अध्यक्ष, संविधानसभाका सदस्य, पूर्व उपप्रधानमन्त्री चित्रबहादुर केसीज्यूको शिघ्र स्वास्थ्यलाभको कामना गर्दछु। आज सम्पन्न मन्त्री परिषदको बैठकले उहाँको सम्पूर्ण उपचार खर्च बेहोर्ने निर्णय गरेको पनि अवगत गराउँछु।

— Bishnu Prasad Paudel (@bpaudel1959) November 12, 2020

एक महिनादेखि भैरहवामा पार्टी महाधिवेशनको तयारी रहेका केसीलाई रुघाखोकी र ज्वरो आएको थियो । त्यहाँ पीसीआर परीक्षण गर्दा नेगेटिभ रिपोर्ट आएका केसीको काठमाडौंमा परीक्षण गर्दा संक्रमण देखिएको हो ।
 
केही दिन अघि उनलाई निमोनिया देखिएको थियो । केसी मंगलबारमात्रै भैरहवाबाट काठमाडौं आएका थिए । संविधानसभा सदस्य केसी केपी शर्मा ओली पहिलो पटक प्रधानमन्त्री हुँदा उपप्रधानमन्त्री तथा  गरिबी निवारण मन्त्री बनेका थिए ।