पाडिकलको शतकमा बेंगलोरको लगातार चौथो जित

काठमाडौँ : देवदुत पाडिकलले शतक प्रहार गरेपछि आइपीएलमा बेंगलोरले लगातार चौथो जित निकालेको छ । बिहीबार राती भएको खेलमा बेंगलोरले राजस्थान रोयल्सलाई १० विकेटले हरायो । मुम्बईमा टस हारेर पहिले ब्याटिङ गरेको राजस्थानले निर्धारित २० ओभरमा ९ विकेट गुमाएर १७७ रन बनायो ।

निकै खराब सुरुवात गरेको उसका लागि शिवम दुवेले ४६ र राहुल टेवाटियाले ४० रन बनाए । बेंगलोरका मोहम्मद सिरज र हर्षल पटेलले समान तीन तीन विकेट लिए । १७८ रनको मध्यम लक्ष्य बेंगलोरले १६ ओभर ३ बलमा कुनै पनि विकेट नगुमाई भेट्टायो । 

उसका लागि देवदुत पाडिकलले शतक प्रहार गरे भने कप्तान विराट कोहलीले नटआउट ७२ रन बनाए । विष्फोटक ब्याटिङ गरेका दुवै जनाले आक्रामक खेल्दै जितका लागि कुनै विकेट नगुमाई १८१ रनको विजयी साझेदारी गरेका थिए ।

जितसँगै लगातार चौथो जित निकालेको बेंगलोर ४ खेलबाट ८ अंकसहित लिगको शीर्ष स्थानमा छ । हार व्यहोरेको राजस्थान भने पुछारमा छ ।