लोकतान्त्रिक-वाम गठबन्धनका साझा उम्मेदवार रामहरि खतिवडा निर्वाचित

काठमाडौँ- लोकतान्त्रिक–वाम गठबन्धनका साझा उम्मेदवार नेपाली कांग्रेसका केन्द्रीय सदस्य रामहरि खतिवडा निर्वाचित भएका छन् । प्रतिनिधिसभा सदस्यमा निर्वाचित भएका खतिवडाले ३३ हजार पाँच सय ५६ मत ल्याउँदा उनका निकटतम् प्रतिस्पर्धी नेकपा (एमाले) का यज्ञराज सुनुवारले २६ हजार सात सय ३८ मत प्राप्त गरेका हुन् ।

विसं २०७४ मा भएको प्रतिनिधिसभा सदस्यतर्फको निर्वाचनमा यज्ञराज सुनुवारसँगै पराजित भएका थिए । त्यसअघि संविधानसभाको दोस्रो चुनावमा ओखलढुङ्गाको तत्कालीन क्षेत्र नम्बर २ बाट प्रत्यक्षतर्फ निर्वाचित भएका थिए । उनी विसं २०७४ को संसदीय निर्वाचनमा वाम–लोकतान्त्रिक गठबन्धनसँग पराजित भएका थिए ।

ओखलढुङ्गा–१ मा कांग्रेसबाट उम्मेदवार बनेका खतिवडालाई एमालेका यज्ञराज सुनुवारले पराजित गरेका थिए । तत्कालीन निर्वाचनमा सुनुवारले ३२ हजार पाँच सय ८० मत ल्याउँदा खतिवडाले २७ हजार तीन सय २७ मत पाएर पराजित भएका थिए ।

अविवाहित नेता खतिवडा युवा पुस्तामा लोकप्रिय हुन् । बुबा जीवनाथ खतिवडा र आमा हेमकुमारी खतिवडाको जेठो सन्तानका रूपमा रामहरि खतिवडा खतिवडा २०२६ साल पुस २४ गते जन्मिएका हुन् । पाँच दाजुभाइ र एक बहिनी मध्येका जेठा खतिवडा अविवाहित हुन् । मानेभन्ज्याङ गाउँपालिका ६ थाक्ले स्थायी ठेगाना रहेका दोस्रो संविधानसभामा (प्रत्यक्ष)बाट निर्वाचित भएका थिए । २०४१ सालमा राजनीतिमा आबद्ध भएका खतिवडा पटक–पटक गरी १ वर्ष छ महिना बन्दी जीवन बिताएका छन् ।

प्रखर वक्ता खतिवडा आफ्नो पार्टी  कांग्रेसभित्र पनि लोकप्रिय मानिन्छन् । उनी राजनीतिमा आउनु अघि शिक्षण पेशामा थिए । २०४५ सालमा उदयपुरको कटारीमा भएको पार्टी अधिवेशनबाट पहिलोपटक जिल्ला कार्य समिति चयन भएका थिए । त्यस यताका महाधिवेशनहरूमा खतिवडा सात पटकसम्म महाधिवेशन प्रतिनिधि रहीसकेका छन् ।