कांग्रेसले आफ्नै नेतृत्वमा सरकार गठन गर्ने प्रयास जारी राख्‍ने

फाइल तस्बिर

काठमाडौँ  : नेपाली कांग्रेसले नेकपा एमालेका अध्यक्षसमेत रहेका प्रधानमन्त्री केपी शर्मा ओली नेतृत्वको सरकारको विकल्पमा आफ्नै पार्टीको नेतृत्वमा सरकार गठन गर्ने प्रयास जारी राखने निर्णय गरेको छ । आज बसेको पार्टी पदाधिकारी तथा पूर्वपदाधिकारी बैठकले ओली नेतृत्वको सरकारको विकल्प खोज्ने प्रयास जारी राख्ने निर्णय गरेको हो ।   

‘ओली नेतृत्वको सरकारको विकल्पमा कांग्रेसको नेतृत्वमा सरकार गठन गर्ने विषयमा सकरात्मक हुँदै गएको छ,’ छलफलपछि कांग्रेस नेता अर्जुननरसिंह केसीले भने ।
कांग्रेसले आफ्नै नेतृत्वमा नयाँ सरकार गठनका लागि माओवादी केन्द्र तथा जनता समाजवादी पार्टीलाई प्रस्ताव नै गरिसकेको छ ।  कांग्रेस पदाधिकारी बैठकले भोलि बस्ने केन्द्रीय समितिको बैठक स्थगित गरेको छ । ‘भोलि बस्ने भनिएको केन्द्रीय समितिको बैठक चाहिँ नबस्ने भएको छ । कोभिड संक्रमणको त्रासका कारण पनि बैठक सार्ने निर्णय भयो,’ केसीले भने ।