सामाजिक दूरीबिनै बस्दैछ प्रदेश सभा बैठक

फाइल तस्बिर

पोखरा : नेपाली कांग्रेसले आइतबार केन्द्रीय सदस्यहरूको पिसिआर परीक्षण गरेर मात्र केन्द्रीय कार्यसमिति बैठक गर्ने निर्णय गरेको छ । आजका लागि बोलाइएको बैठक स्थगित गर्दै नेगेटिभ आउनेहरूलाई मात्र सामेल गर्दै १५ वैशाखमा बैठक बस्‍ने कांग्रेसको निर्णय छ ।

तर गण्डकी प्रदेश सभाको सोमबारको बैठक भौतिक दूरीबिना नै बस्दैछ । नदीपुरस्थित साँघुरो प्रदेश सभाभित्र संसद बैठक बस्‍नेछ । यही भवनमा प्रदेश सभाका छैटौं अधिवेशनमा सामाजिक दूरी कायम गर्न नसक्ने भन्दै सभागृहमा संसद बैठक राखिएको थियो । तर अहिले भने सामाजिक दूरीको ख्याल नगरी नदीपुरमै बस्‍न लागेको हो । ‘अब दूरीसूरी छैन, खोप लगाइसकेका छौँ, नदीपुरमै बैठक बस्छ,’ प्रदेश सभा सचिव हरिराज पोखरेलले इकागजसँग भने । 

स्वास्थ्य निर्देशनालय गण्डकी प्रदेशमा निर्देशक विनोदविन्दु शर्मा भने खोप लगाउने ९६ प्रतिशतमा कोरोना नलाग्‍ने र भौतिक दूरी कायम गरेर बैठक बस्‍नु उचित हुने बताउँछन् । ‘दोस्रो चरणको खोप लगाउने ९६ प्रतिशतमा देखिँदैन भन्‍ने रिपोर्ट छ,’ उनले भने, ‘पहिला एकपटक दूरी कायम गर्न सभागृहमा गरेको थाहा थियो, अहिले कसरी बस्नुहुन्छ मलाई थाहा छैन ।’ खोपको २ डोज नै लगाएकालाई पनि कोरोना संक्रमण भएको उदाहरण पोखरामै फेला परेको छ ।

गण्डकी प्रदेश सभाको विशेष अधिवेशन सोमबार सुरु हुँदैछ । विशेष अधिवेशनको पहिलो दिन सोमबारको बैठकमा अविश्वास प्रस्तावका प्रस्तावक तथा नेपाली कांग्रेस संसदीय दलका नेता कृष्णचन्द्र नेपाली पोखरेलले बोल्नेछन् । सामान्यतः अधिवेशनको सुरु दिन दलका नेताहरूले बोल्ने गरेपनि यो अधिवेशनमा भने त्यस्तो हुने छैन । प्रस्तावकले बोलेपछि सांसदहरूले अविश्वास प्रस्तावमाथि बोल्नेछन् । पहिलो दिनको बैठकमा कति सांसदले बोल्ने भन्‍ने टुंगो लागेको छैन् । सोमबार र मंगलबार सांसदहरूले अविश्वास प्रस्तावमाथि छलफल गर्नेछन् । सांसदहरूले बोलेपछि मुख्यमन्त्री पृथ्वीसुब्बा गुरुङले जवाफ दिने र मतदानको प्रक्रिया अगाडि बढाइने कार्यव्यवस्था परामर्श समितिका सदस्य सांसद कुमार खड्काले जानकारी दिए ।

नेपाली कांग्रेस, माओवादी केन्द्र र जनता समाजवादी पार्टीले अविश्वास प्रस्ताव दर्ता गरेर विशेष अधिवेशन डाक्न समावेदन दिएका थिए । प्रदेश प्रमुख अमिक शेरचनले ६ गते आह्वान गरेअनुसार १३ वैशाख सोमबार विशेष अधिवेशन बस्‍न लागेको हो ।

गण्डकी प्रदेश सभामा सत्तारुढ नेकपा एमालेमा २७ र १ स्वतन्त्र गरी मुख्यमन्त्रीको पक्षमा २८ सांसद छन् । विपक्षी मोर्चामा नेपाली कांग्रेसका १५, माओवादी केन्द्रका १२ (सभामुखसहित), राष्ट्रिय जनमोर्चाका ३ र जनता समाजवादी पार्टीका २ सांसदसहित ३२ सांसद छन् ।