विदेशी भूमिबाट खेलमा फर्कंदै नेपाली खेलाडी

काठमाडौं : करिब एक वर्षपछि नेपाली फुटबल खेलाडी खेलमा फर्कंदैछन् । त्यो पनि घरेलु रगंशालाबाट होइन विदेशी भूमिबाट । दुई मैत्रिपूर्ण खेल खेल्न बंगलादेश पुगेको नेपाली टोलीले पहिलो खेलमा शुक्रबार घरेलु टीमको सामना गर्दैछ । गत नोभेम्बर १९ मा विश्वकप छनौटमा कुवेतविरुध्दको खेलपछि नेपालका लागि बंगबन्धु रंगशालामा हुने खेल नै पहिलो हो ।

कोभिडले नेपाली खेलकुद ठप्प रहेका कारण पनि विगत १२ महिनामा नेपाली फुटबलरले अभ्याससम्म गर्न पाएनन् । त्यसमाथि क्याम्पमा बोलाइएका सात खेलाडीहरुलाई कोरोना पोजिटिभ देखिएपछि युवाले भरिएको नेपाली टोली दुई हप्ता भन्दा कम अभ्यास गरी बंगलादेश गएको हो । कोभिडका कारण लागेको यात्रा प्रतिबन्धका कारण स्वीडेनबाट मुख्य प्रशिक्षक योहान कालिन नेपाल फर्किन नसकेपछि बाल गोपाल महर्जनलाई नेपाली टोली हेर्ने जिम्मेवारी दिइएको छ । कोभिडका कारण खेलाडीहरु गुमाउनु, छोटो अभ्यास, मुख्य प्रशिक्षकको अनुपस्थिती र विदेशी भुमिमा खेल जस्ता कारणहरुले नेपाललाई बंगलादेशविरुद्ध अन्डरडग बनाएको छ ।

त्यसो त यी मैत्रीपूर्ण खेलहरु तत्काल नतिजाका लागि भन्दा पनि विश्वकप छनौटमा बाँकी रहेका खेलहरुका लागि तयारीका रुपमा लिनुपर्ने आवश्यकता छ । प्रशिक्षक महर्जनले मिडियासँगको कुराकानीमा पनि नतिजामा ध्यान दिन नहुने इङ्गित गरे । ‘हामीले छोटो समय तयारी गरेका छौ । कोभिडका कारण खेलाडीहरु पनि गुमाएका छौं । तर पनि राम्रो नतिजा दिने प्रयास गर्ने नै छौं’ महर्जनले भने ।

बंगलादेश भ्रमणमा रहेको नेपाली टोलीमा आठ नयाँ अनुहार छन् । पुजन उपरकोटी, सेसेहाङ आङदेम्बे, दर्शन गुरूङ, दीप कार्की, दिलेन लोक्ताम, एरिक विष्ट, विकास खवास र छिरिङ गुरूङ पहिलोपटक नेपालको सिनियर राष्ट्रिय टीममा परेका हुन ।

प्रशिक्षक महर्जनले नतिजामा ध्यान नदिने भनिरहेपनि उनले नयाँ खेलाडीहरुको प्रयोगमा धेरै उदार नहुन सक्छन् । दक्षिण एसियाली प्रतिद्वन्द्वीविरुध्दको खेलमा जित्नै पर्ने मानसिकता रहने भएकाले पनि महर्जनले टीमका सिनियर खेलाडीहरुलाई नै प्राथमिकतामा राख्ने सम्भावना छ ।

नेपालले एलेसम्म बंगलादेशसँग १९ खेल खेलेको छ । त्यसमा नेपालले ६ खेलमा मात्र जित दर्ता गरेको छ भने १२ खेलमा बंगलादेशले नतिजा आफ्नो पक्षमा पारेको छ ।   

नेपालको टीम :
अजित भण्डारी, अनन्त तामाङ, अन्जन विष्ट, एरिक विष्ट, भरत खवास, विकास खवास, विक्रम लामा, विमल राना, विशाल श्रेष्ठ, दर्शन गुरूङ, दीप कार्की, दिलेन लोक्ताम, जर्ज प्रिन्स कार्की, किरण चेम्जोङ, नवयुग श्रेष्ठ, पुजन उपकोटी, रन्ञ्जित धिमाल, रवि पासवान, सरोज दाहाल, सेसेहाङ आङदेम्बे, सुभास गुरूङ, सुजल श्रेष्ठ, सुमन अर्याल, तेज तामाङ र छिरिङ गुरूङ । 

प्रशिक्षक : बालगोलपाल महर्जन
सहायक प्रशिक्षक : किरण श्रेष्ठ
गोलकिपिङ प्रशिक्षक : विकास मल्ल
खेल समय : शुक्रबार ४:४५