पीसीआर परीक्षणकाे माग गर्दै गण्डकी प्रदेशसभा अवरुद्ध गर्ने तयारी

पोखरा : सत्तारुढ नेकपा एमालेले गण्डकी प्रदेशसभाको बैठक अवरुद्ध गर्ने तयारी गरेको छ । प्रदेशसभाको विशेष अधिवेशनको दोस्रो बैठकमा पीसीआर परीक्षणको माग गर्दै बैठक अवरुद्ध गर्ने तयारी गरेको एमालेका एक सांसदले इकागजलाई बताए ।

विशेष अधिवेशनको पहिलो बैठकमा एमालेका प्रमुख सचेतक मायानाथ अधिकारीले पीसीआर परीक्षणको माग गर्दै बैठकको सुरुआतमै आपत्ति जनाएका थिए । पहिलो बैठकमा मुख्यमन्त्री पृथ्वीसुब्बा गुरुङविरुद्ध अविश्वास प्रस्ताव पेस भएको छ । 

अविश्वास प्रस्तावमाथि हुने मतदान धकेलेर केही समय निकाल्ने र दलहरुसँग छलफल गर्ने सत्तापक्षको योजना छ । आजको बैठकमा बोल्नका लागि २५ जनाको कार्यसूची थियो । आज प्रदेशसभा बैठकको सुरुमा एमाले सांसद राजिव पहारीले बोल्ने र त्यसपछि प्रदेशसभा बैठक चल्न नदिने एमाले सांसदको गोप्य योजना छ ।